باشلاندێ حسین‌ین ایام عزاسی

بـاشـلانــدێ حسیـن‌ین ایّـام-ی-عـزاسـی

سیزده‌ن کؤمک ایسته‌ر حقّ‌ین شُهداسی

قلبینده امام-ی-عصرین غمی آرتار

جهد ائیله اماندیر پوْزما بۇ اساسی

گر عئشقی حسینی درک ائتسوْن اؤزۆنده

اشگون قطراتین گیزله‌تمه گؤزۆنده

لبّیک دیلونده گؤز یاشێ یۆزۆنده

ائیله شه-ی-دینه خیدمت بۇ سؤزۆنده

فرض ائت اۇجالۇبدۇر «ینصرنی» صداسی

تؤک شیشه‌ی-ی-دیلده‌ن روخساره گولابی

کیم آغلار حسینه، آرتێقدێ{ر} ثوابی

فیض-ی-عبراتون یوْخ حد-وْ-نصابی

عاجیزدێ ملک‌لر ائتسین بۇ حئسابی

واضح‌دێ بۇ مطلب یوْ چون-وْ-چراسی

ینصرنی بۇیۇردۇ، سلطان-ی-حقیقت

بۇ کلمه‌ده اوْل شاه، ائتدی سیزی دعوت

ایندی بۇ عزاده هر کیم ائده خیدمت

مثل اینکه شهادت اوْلمۇش اوْنا قیسمت

البته شهیدین جنّتدیر بهاسی

هر کیم وۇرا زنجیر، هر کیم وۇرا سینه

تنبیه ائله‌ییبدیر خصم-ی-شه-ی-دینه

اوْن گۆن دۇتۇلۇر یاس، هر ایلده حسینه

چۆنکۆ اوْ مقدّس، قانون سَببینه

دین-ی-نبوی‌نین مُحکم‌دی بناسی

بۇ شأن-وْجلاله، قۇربانم حسین جان

عالمده آچێبسان بیر سفره‌ی-ی-ائحسان

عرش-ی-حقه گئتدی، حلقوندان آخان قان

اوْل قانێ وئریبسه‌ن جنّاتی آلێبسان

بۇ بارده حقّین وار عئین-ی-رضاسی

فکریمده دوْلاندێ اوْل غملی زمانون

آغزۇندا عطشده‌ن دؤنمه‌زدی زبانون

زینب کؤمه‌گینه اوْلمادێ توانون

سنگین یارالاردان جوش ائیله‌دی قانون

شئمرین اۇجالاندا مئیداندا نداسی

شعر: استاد یحیوی

محرم باشلانماسێ نؤحه‌سی

یـاران گلیـن فغـانـه، مــاه-ی-محــرم اوْلـدۇ

دۇتدۇ جهانی ماته‌م، بیر اؤزگه عاله‌م اوْلدۇ

بیلمه م نه غمدی یارب، تازه‌له‌نیر بۇ هر ایل

بـۇ دردیـده‌‌ن عـلاوه، اوْلـدۇ غریبـه موشکـول

اوْلمـاز بـۇ درده چـاره، اوْلدۇ بۇ تازه نیسگیـل

اوْل شاه-ی-کم سیپاهین، زوواری بر هم اوْلدۇ

نیسگیلله‌رون فداسی ائی شاه-ی-بی‌مددکار

اوْلمـادێ گــرچــی بـۇ ایـل، کـرب-وْ-بـلایه زووار

ساللێــق خییالـه قبـرون، اوْللـۇق سنـه عـزادار

بۇ ایلده بۇ موصیبه‌ت غـم اۆسته بیر غـم اوْلـدۇ

هانسێ غمینله موْلا بیلمه‌م گله‌ک فغانـه

یـوْخدۇر دیلیمـده یارا، جوملـه چکیـم بیانـه

کیمدیر دؤزه سنین تک، بۇ درد-ی-بیکه‌رانه

کیم سن کیمی بلاکئش، ائی فخرئ عاله‌م اوْلدۇ

وئردیله عون-وْ-جعفر، اوْل چؤلده تئشنه لب جان

اوْلــدۇ علـی-ی-اکبـــر راه-ی-خـــۇداده قـۇربـــان

ائتدیله شیرئ‌خواره طئفلون، نئشـان-ی-پئیکـان

ظۆلـم اۆستـه ظۆلـم-ی-تـازه، مـوْلا دۇبـاره اوْلـدۇ

لئیـلانـی ائتـدی مجنـون اوْل اکبـریـن فـراغــی

صبـر-وْ-قـراریـن آلـدێ، وصـلینیـن ایشتییاغــی

اؤلدۆردیله‌ر سیته‌ملـه، گؤرمـه‌دی توْی اوْتاغی

گـؤردۆ بـۇحالــی لئیـــلا دردیلــه همــده‌م اوْلـــدۇ

قالماز اۆره‌کده طاقه‌ت، چۆن ذیکر اوْلاندا ائسمون

قالدێ قۇرۇ یئر اۆسته، اۆچ گۆن یارالێ جئسمون

آت چاپدێ نعشون اۆسته، موْلا اوْ چؤلده خصمون

اوْل چؤلده ایستی قۇملار، رخمیوه مرهـه‌م اوْلـدۇ

فریاد اوْلا اوْ وقتـه‌ن ائـی سـروه‌ر-ی-مدینـه

قتلگه‌هی گزیـردی، نـازلـێ قێزێـن سکینـه

تاپدێ یارلێ نعشون، اوْل ماه-ی-بی‌قرینـه

وۇردۇ زی بسکـی باشـه، احوالـی بر هـم اوْلــدۇ

چکــدی نه درد-وْ-غملـه‌ر، کرب-وْ-بــلاده زینـب

تـاب ائتـدی هــر بــلایــه، راه-ی-وفــاده زینـب

گؤردۆ سر-ی-حۆسئینی، نوکئ جیداده، زینب

غمـده‌ن آغـاردی زولفی، رعنـا قـدی خــم اوْلــدۇ

شاعر:دلریش

یـاران گلیـن فغـانــه، ماه-ی-محرم اوْلدۇ

گینـه مــاه-ی-عــزا گلیــر

یانان اۆره‌کــده‌ن نـوا گلیـر

یئـل اسـه‌نــده اۆره‌کلـــه‌ر

صفـای-ی-کرب-وْ-بلا گلیر

هــامــێ درده دوا گــلیــر

گینــه اســدی قـارا عله‌ملـه‌ر

قۇرۇلوبدۇ مجلیس-ی-غملـه‌ر

اۇجالێب بانگ-ی-واحۆسئیـن

قارا گئی سسله یا حۆسئین

ائی ابوالفضلین عاشیقـی

گلیــر محــرم نــوایــه گــل

دۇت الینــده‌ن مــریضیـویـن

اده‌بلــه دار-وْ-الشفایـه گـل

آلـــاســـــان دردیــــــوه دوا

مطّب-ی-شاه-ی-ولایه گل

حــره‌م-ی-کــربــلایــه گــل

گینــه اســدی قـارا عله‌ملـه‌ر

قۇرۇلوبدۇ مجلیس-ی-غملـه‌ر

اۇجالێب بانگ-ی-واحۆسئیـن

قارا گئی سسله یا حۆسئین

دیل-ی-سققـا تـک آهیلـه‌ن

الهی هئـچ سینـه یانمـادێ

باشێنــا دگـــدی بیـر عمـود

اوْ قانلێ گؤزده‌ن اۇتانمـادێ

اوْ سێنان باش ائشتمیشـم

جێـدا بـاشێنـدا دایـانمــادێ

سیتـه‌م اهلـی اۇتــانمـادی

گینــه اســدی قـارا عله‌ملـه‌ر

قۇرۇلوبدۇ مجلیس-ی-غملـه‌ر

اۇجالێب بانگ-ی-واحۆسئیـن

قارا گئی سسله یا حۆسئین

سـۇ یانێنــدا دۆشـه‌ن قـوْلا

بو شیعه‌له‌رده‌ن سلام اوْلا

آقـامێـن اوْخلـێ مشکینــه

ســلام-ی-مــا لا کـلام اوْلا

در-ی-عبـــاسیــده گــره‌ک

تمــام شـاهـلار غـۇلام اوْلا

اوْنـــا بیـــزده‌ن ســلام اوْلا

گینــه اســدی قـارا عله‌ملـه‌ر

قۇرۇلوبدۇ مجلیس-ی-غملـه‌ر

اۇجالێب بانگ-ی-واحۆسئیـن

قارا گئی سسله یا حۆسئین

سالێـب عالـه‌ملـه‌ری غمـه

اوقهـره‌مـانیـن چتیـن غمی

ایکی قوْل بیر گؤزۆن وئریب

اۆره‌کده قرآن-وْ-دین غمـی

دل-ی-زهـرانـی یانـدێـرێب

عزیــز-ی-امّ البنیـن غمـی

اوْ کسیلمیش الیـن غمـی

گینــه اســدی قـارا عله‌ملـه‌ر

قۇرۇلوبدۇ مجلیس-ی-غملـه‌ر

اۇجالێب بانگ-ی-واحۆسئیـن

قارا گئی سسله یا حۆسئین

شاعر: کلامی زنجانی

جوشی اول محرم

سس دۆشدۆ اهل-ی-عاله‌مه ماه-ی-عزا گلـدی

ائــی کــربــلا آمــاده اوْل شــاه-ی-هــوْدا گلـدی

ماه-ی-محرمدیر سنین دشتین اوْلۇب گۆلشه‌ن

منزیل ائدیب سنده حۆسئین ائی وادی ایمـه‌ن

قـوْیمـا فـراتـه ال تـاپـا بـی‌رحـم‌دیــر دۆشـمـه‌ن

بیـر کـاریـوان مـئهمـان سنـه ائـی کـربـلا گلــدی

دریای-ی-رحمه‌تده‌ن چێخێب بیر گؤهه‌ر-ی-آلماس

همتــا اوْلا بیلمـه‌ز اوْنـا هئـچ خئضـریلـه‌ن ائـلیـاس

ظـۆلمـاتـه نـورافکه‌ن سالێب، بدر-وْ-الدوْجا عبـاس

نصـر مـن الله پـرچـه‌مـی صاحیب-ی-لـوا گـلـدی

قوْیدۇ قده‌م توْپراغۇوا شـاه-ی-ملئـک لئشگـه‌ر

سییاره‌ی-ی-شمس-وْ-قمه‌ر قاسم علی اکبـر

محمیلــده بـانـــوی حـــره‌م گهـــواره‌ده اصـغــر

زهـرا قێـزێ زینـب کیمــی بیـر مــه لیقـا گلــدی

واضیح دئییم آخه‌ر سنه ائی کعبه‌‌ی-ی-ثانی

شام اهلی آغلار قوْیماسێن بیچـاره لئیلانـی‌

قوْیما گتیرسین مقته‌له سعـد اوْغـلۇ زهرانـی

جـام الـده بیـر اۆچ یاشـدا قێـز دیلـده نــوا گلـدی

قوْیما حریموندا سنین شمر ائیله‌سین طوْغیان

طاووس-ی-زررین چترلـه‌ر تا اوْلماسێـن گیریـان

قوْیما سپئهـر-ی-عیــززه‌تــه صییـاد آتـا پئیـکـان

شهپـه‌ر آچێـب گـۆلـزاریـوه فـوْج-ی-هوْمـا گلـدی

تاپدێن مقام-وْ-منزیله‌ت ائـی دشـت-ی-میهمانـدار

دئ کسمه‌سین قوْم-ی-اسد یوْل اۆسته قۇربانـلار

یئتمیش ایکی جان وئرمه‌گه گـۆل اۆزلۆ قـۇربـان وار

یاسـه باتـان تـوْی حیجلـه‌سی نوْ کـدخۇدا گلدی

یاز نادری عاله‌م بۇ گۆن گئیمیش قارا آغلار

ال قوْلتۇغۇندا مرد-وْ-زن، شاه-وْ-گئدا آغـلار

گـویا محرمـدیـر گینـه، ارض-وْ-سـمـا آغـلار

صاحیـب عـزادیـر مجلیسـه خیـر-وْ-النسـاء گلدی

شاعر: نادری

حضرت ابوالفضل(ع)ین امان‌نامه‌سی

غم لئشگری لئشگرگه-ی-اسلامه گلیبدیر

سس دۆشدۆ ابوالفضله امان نامه گلیبدیر

تل اۆسته چێخێب شئمر-ی-خطادیده خطاکار

آوازیله سسله‌ندی ابوالفضلی اوْ غدّار

گلدی اۇجا بوْیلۇ اوْ اۇزۇن قوْللۇ علمدار

تعظیم ائدیب عبّاسه او بی‌دین-ی-ستمکار

برنامه وئریب آشدێ باخێب بُهتیده قالدێ

تئز پارچالادێ چکمه‌سینین آلتێنا سالدێ

اوْلسئیدی اگر شهده‌ن ایجازه اوْیاناردۇن

بۇ تیغ-ی-شررباریله قانه بوْیاناردۇن

حئیرتله اوْ بی‌دین الینی بیربیره وۇردۇ

دال دالی گئدیب ساق دیزی اۆستۆنده اوْتۇردۇ

شاهین اوْ شجاعتلی علمدارینه باخدێ

شهلا گؤزۆنه قدّینه قوْللارێنا باخدێ

عرض ائیله‌دی عبّاس ائشیت موعظه منده‌ن

اؤز نفسیوه رحم ائیله ال چک بۇ حسینده‌ن

دونیا بۇ حسین‌سیز دئدی بیر کلمه‌ی-ی-لادور

چوْخ موعظه ائتمه بۇرا مئیدان-ی-بلادور

آیرێلدێ گلیب خئیمه قاباغێندا دایاندێ

ایستیردی گئده محضر-ی-سلطانه اۇتاندێ

سالدێ آشاغا باشێنێ جوش ائیله‌دی غیرت

من حدس ائدیر‌م گلمه‌دی چون چکدی خجالت

شاه-ی-شُهدا بیلدی بۇلۇتلار کیمی دوْلدۇ

گلدی اۇجا بوْی قارداشێلان قوْل بوْیۇن اوْلدۇ

قارداش دئدی مانع دگیله‌م گئتسوْن ابوالفضل

من بی‌کسی ‌بی‌یاوه‌ی ترک ائتسوْن ابوالفضل

من باغلامێشام روز-ی-ازل اؤلمه‌گه پئیمان

سن سالما بلایه اؤزینی تازه جاوانسان

منده‌ن نیگران اوْلما مرامه چاتارام من

دونیا سؤزۆنۆن داشێنێ باشدان آتارام من

صبّاح بۇ بیابانیده قانه باتارام من

شئشماهه بالام سینه‌ده راحت یاتارام من

عرض ائیله‌دی یا سیّدی قلبیمده یارام وار

نوکرلری قوْومازلار اگر قوْوسوْن هارام وار؟

درک ائتدی امان نامه سؤزۆن ماه-ی-مدینه

یێغدێ باشێنا دربه‌در اطفالی سکینه

سسله‌ندی آچێن باشۇزۇ باشۇزدا بلا وار

عبّاس عمومی کرب-وْ-بلادان آپارۇرلار

قێزلار گؤزۆ یاشلێ، هامودان دۆشدۆ قباقه

گلدی اوْ خانیم، سۆدامه‌ری آلدێ قۇجاقه

بیردن هاموسی سسله‌دی لای‌لای علی اصغر

گئتسه عمومیز وای بیزه وای علی اصغر

دۇرمۇشدۇ همان یئرده اۇزۇن قوْللۇ علمدار

بیرده‌ن آقانێ دؤره‌له‌دی خۇرداجا قێزلار

بیر ناله بلند اوْلدۇ سکینه اۆره‌گینده‌ن

اگله‌شدی یئره دۇتدۇ ابوالفضل اته‌گینده‌ن

عبّاس عمو گئتمه بۇ یانان لب‌لره خاطیر

قوْیما بیزی چؤللرده علی اصغره خاطر

فوراً آلێب آغوشه الین باشینه چکدی

جوش ائیله‌دی غیرت، گؤزۆنۆن یاشێنێ تؤکدۆ

آیرێلمئیوب هر قدر بۇ قوْللار بدنیمده‌ن

آیرێلمارام ای نازلی سکینه بالا سنده‌ن

گۆن باتدێ بلا آرتدێ گؤرۆندۆ مه-ی-تابان

اۇلدۇزلارێلان اوْلدۇ سماوات چێراغان

سؤندۆردۆ چێراغلارێ حسین قلبی‌لر اسدی

سسله‌ندی گئدین خالِق-ی-یکتا منه بسدی

صبّاح قیامتدی بۇ صحرای بلاده

کیم قالسا گره‌ک غرق اوْلا دریای-ی-بلاده

سس دۆشدۆ باشێندان داغێلێب چؤللره لئشگر

قێرخ آلتێ نفر قالدێ، اوْتۇز بئش قارا معجر

باخدێ داغێلان لئشگه‌ره آواره رقیّه

تؤکدۆ گؤزۆنۆن یاشێنێ بیچاره رقیّه

یاندێ گینه مشعل‌لر ائدیب حجّت‌ین اتمام

گؤردۆ دایانێب تیتره‌ییر عبّاس-ی-دل‌آرام

سسله‌ندی زُهِیر ایله حبیب ابن مظاهر

ای فاطمه دلبندی کی ای طیّب-وْ-طاهر

سن غرق اوْلاسان قانلێ بۇ دریاده حسینیم

بیز عازم اوْلاق مسکن-ی-مأوایه حسینیم؟!!

صبّاح نه دییه‌ک حضرت-ی-زهرایه حسینیم

سنده‌ن سوْرا عار اوْلسۇن اوْ دونیایه حسینیم

شاه-ی-شُهدا اللری قوْینۇندا دایاندێ

شمعین باشێنا دسته‌ی-ی-پروانه دوْلاندێ

ائتدی بیر اشاره چکیلیب پرده‌ی-ی-ظۆلمات

گؤرسه‌ندی اوْ دم گؤزلرینه روضه‌-ی-جنّات

امر ائیله‌دی اصحابه اگر اوْلسا قبیلوْز

تا اهل-ی-عیالی آپارێن ساکین ائدین سیز

عورتلروزی قوْیمئیون عُدوان آراسێندا

صبّاح قالالار ورطه‌-ی-توفان آراسێندا

گلدی هاموسی اهل-ی-عیالین ائدیب احضار

چێخدێلا سراسیمه اوْ عصمتلی خانێملار

سسله‌ندیله حضرت بۇیۇرۇر حاضر اوْلۇن تئز

بۇ قوْرخۇلۇ چؤلده‌ن سیزی بیر یانه چکه‌ک بیز

بۇ کلمه‌نی درک ائتدی اوْ غیرتلی خانێملار

بیرده‌ن هامۇسێ آغلادێ جوش ائیله‌دی قانلار

ناله گئجه‌نین عالمی قوْزاندێ سمایه

عورتلر اوْ شاهێن چادیرین آلدێ آرایه

سسله‌ندیله ای عالَمه اوممید حسین‌جان

رحم ائیله بیزی قوْما قاپۇندان سنه قۇربان

رحم ائت بۇ آدامسێزلارا پئیغمبره خاطیر

قوْما بیزی شئشماهه علی اصغر خاطیر

سسله‌ندی چادیردان اوْ زمان شاه-ی-شهیدان

صبّاح قوْپاجاقدۇر بۇ بیابانیده توفان

قصدیم بۇدۇ سیز قالمێیاسۇز قان آراسێندا

قانلار تؤکۆله‌ن وقتیده توفان آراسێندا

درک ائتدی خانێملار بۇ سؤزۆ آغلادێ های‌های

سسله‌ندیله ائیوای حسین وای حسین وای

بیز گئتدیک اگر جمع-ی-پریشان هارا گئتسین؟

زینبده آدامسێزدێ حسین‌جان هارا گئتسین؟

بۇ السیز آیاقسێز بۇ سۇسۇزلار هارا گئتسین؟

بی‌کس آتاسێز خۇرداجا قێزلار هارا گئتسین؟

بیز گئتدیک حسین نازلێ رقیّه‌وْن هارا گئتسین؟

قارداشسێز اوْ ایسته‌کلی رقیّوْن هارا گئتسین؟

زینب یانان اوْدالاردا دۆشۆب یاننێق حسینیم

چؤللرده قالێب قوْل-قوْلا باغلاننێق حسینیم

قوْشار: منعم اردبیلی

امام(ع) گؤزل قێزێ سکینه خاتونا جاواب وئریب

گئتدی عمون سکینه جان، قانه بوْیاندێ گلمه‌دی

وئردیگی اؤز سۇ قولونا، سنده‌ن اۇتاندێ گلمه‌دی

زرمده گؤردۆ نظمله‌ن لئشگه‌ر-ی-کفری صف به صف

شطّه گئدیبدی شیر تک، وارث-ی-شحنه‌ی-ی-نجف

نهر فراتی اوّلین حمله ده ائیله‌دی هدف

سۇ اله گلدی ایچمه‌گه نفسی دایاندێ گلمه‌دی

چێخدێ قۇرۇ دوْداغیله‌ن بیر سۇلۇ مشگیله‌ن سۇدان

مکریله کسدی ساق سوْلۇن یاتدێ کمینده کوفیان

چێخماغا نخلزاریده‌ن دوشمنی وئرمه‌دی امان

گئتدی سۇ اۆسته اللری، صبری تالاندێ گلمه‌دی

گؤزده‌ن علاوه ساخلادێ، مشگین اوْ شیر-ی-جان‌سپر

چوْخ چالێشێردێ مشگینه سینه‌سین ائیلییه سپر

حئیف اوْلا قانا دؤنده‌ریب اشگینی ناوک-ی-سه‌پر

حالینه گؤردۆ مشگینین اشگی رواندی گلمه‌دی

ایندی گؤزۆمده عؤمرومون بیردی گئجه‌یله گۆندۆزۆ

بۇپارا مشگیده‌ن بۆتۆن کشف اوْلۇ مطلبین دۆزۆ

مشگیده اوْلمادێ سۇیۇ گلمه‌گه گلمه‌دی یۆزۆ

بوْش الیله‌ن قَییتمه‌یی گؤردۆ گیراندی گلمه‌دی

بیر نفرین الینده کی جنگیده اوْلمادێ کسه‌ر

هر قده‌مینده اوْن نفر آتلێ قاباغێنێ کسه‌ر

گؤرمه‌سه ال حریفده، قانلێلار ال چکه‌ر مگر

کسدیله چون قاباغێنێ، رأیی دوْلاندێ گلمه‌دی

تن به تن اوْلدۇ روبرو هر کس اوْ پهلوانیله‌ن

قوْرخمادێ تیریله‌ن وۇران، وۇردۇ داخێ کمانیله‌ن

صدمه یئتیبدی باشێنا، گؤزلری دوْلدۇ قانیله‌ن

گؤز دۇتۇلۇب گؤره‌نمه‌دی، خئیمه هایاندێ گلمه‌دی

گۆلشن-ی-آرزوده بیر گۆل بیتیره‌نمه‌دیم قێزێم

قالدێ الیم بئلیمده من ال یتیره‌نمه‌دیم قێزێم

بسکی بئلیم شکستیدی تک گتیره‌نمه‌دیم قێزێم

نی‌کیمی چوْخ سێزێلدادێم قلبیده یاندێ گلمه‌دی

سرویدی من دئدیم دۆشۆب خول تۆکۆلۆب خول اۆستۆنه

قوْللارێ پیشوازیمه دۆشمۆشدۆ یوْل اۆستۆنه

قوْیدۇ سۇ اشتیاقینه بیر گؤز ایکی قوْل اۆستۆنه

سۇ گینه راضی اوْلمادێ آخدێ جالاندێ گلمه‌دی

عمّه‌وه وئر خبر قێزێم نوحه ائدین عزا قۇرۇن

دیلده سۇ آرزوسینه یکسره پُشت-ی-پا وۇرۇن

اؤلدۆ وفالی قارداشێم خئیمه‌سینی یێغێشدێرون

شهپری شاهبازیمین چوْخ یارلاندێ گلمه‌دی

قالدێ ستمله یا حسین «منزوی» چوْخ فشاریده

مرجعی یوْخ عدالتون بیر بئله روزگاریده

قلبی یارالێ شیعه‌لر قالدێلار انتظاریده

قان آلان اوْغلۇوۇن مگر وقتی هاچاندی گلمه‌دی؟

استاد منزوی اردبیلی

سکینه خاتون و حضرت ابوالفضل شهادتی

گئتـدون بـابـا اومـمیدیـلـه قـارداش دالـسێـجـا

تؤکدۆم من اۆره‌ک قانێنێ، گؤز یاش دالسێجـا

آلدێم اله سۇ جامینی فورا" یوْلا چێخدێم

وئردیم بۇ سۇسۇز قێزلارێلان قوْل-قوْلا چێخدێم

سن گئتدون اؤزۆم قێزلارێ گتدیم یوْلا دۆزدۆم

ائتدیم ایکی صف تئشنه‌لری ساق-سوْلا دۆزدۆم

سیزده‌ن باباجان ایسته‌دیم اوْلا دۆزدۆم

فکر ائتدیم علمداریله یان-یانا گلیرسن

آخر نه بیلیم تک بوْیانێب قانه گلیرسن

باخدێم سارالان رنگیوه، ائتدی منی حالی

قارداش‌سیزین عالمده بئله رنگی سارالێ

بۇ مشک بۇ پرچم ندی بۇ مرکب-ی-خالی

سالار-ی-حرم، صولت-ی-سرداره نه گلدی

قانلێ عَلَمین گتدون علمداره نه گلدی

گؤرره‌م پارا مشگینده غم-ی-مُبهمی واردۇر

سوْیۇق ائوی آباد اقلا" نمی واردۇر

بیر جرعه‌سی اوْلسا آنامون نه غمی واردۇر

تک جرعه سۇ باری قۇرۇیان لب‌لره بسدی

آنجاق دوْداق ایسلاتسا علی اصغره بسدی

دوْغراندێ عَمومدا مگر اکبر سیاقیندا

دۆشدۆ یانار اوْدلاره اوْدا سۇ سوْراغێندا

قوْیدۇن نییه بس نعشینی دوشمن قاباغێندا

یا پئیکرین اوْل اشجع‌ ناسین گتیرئیدون

یا دفن ائله‌ییب قانلێ لیباسین گتیرئیدون

وای بختیمه اوممود گۆلۆم گؤر نئجه سوْلدۇ

داشدێ اۆره‌گیم قانێ گؤزۆم جامینه دوْلدۇ

آخر نئجه دوْغراندێ کی حملی چتین اوْلدۇ

آت اۆسته گله‌نمیردی پییاده گتیرئیدون

نعشین بۆکۆب اکبر تک عباده گتیرئیدون

سنله‌ن نه دانێشدێ بابا اوْل کان-ی-مُروت

آخر نفسینده سنه ائتدی نه وصیّت

ائیله اوْ وصیّتلریده سن بیزه صُحبت

عؤمر ائتسه وفا، ائتسه‌ک اگر عزم-ی-مدینه

نیسگیل آپاراق سؤزلرینی امّ بنینه

تؤکدۆ بۇ فلک باشیمه خاکستر-ی-ماتم

واضحدی اسیر اوْلماقێمێز اوْلدۇ مُسلّم

وئر قانه باتان پرچمینی ساخلاسێن عمّه‌م

شاید اوْلا بیر گۆن بۇ بلادان قۇتاراق بیز

قانلێ عَلَمین اوْغلۇنا سوْوقات آپاراق بیز

آتدان اؤزۆ دۆشمۆشدۆ عَموم سن یئتیشه‌نده

یا سن کؤمک ائتدون اوْنا توْپراغه دۆشه‌نده

آخر بابا هئچ قوْل بوْیۇن اوْلدۇز گؤرۆشه‌نده

سروون یێخێلان وقتیده سن ال یئتیریبسه‌ن

یا قانه باتان پرچمی یئرده‌ن گؤتۆرۆبسه‌ن

قلبیم سوْیۇمۇر گؤزده‌ن آخێر بیر بئله قان یاش

سن وئرسوْن اجازه قاچارام مقتله بیر باش

ال باشدان اۇجالدێب باشێ اۆسته آچارام باش

قانێن یاخارام زۆلفیمله‌ن یۆز گؤزه گۆللـه‌م

غیرتلی عموملان قوْیارام یۆز-یۆزه گۆللـه‌م

سنگ-ی-فلکه عُقده اوْلۇب صافی-ی-شیشه

فرصت گزیری سایه‌لی سروی یێخا تیشه

عبّاس وجودی بیزه سایئیدی همیشه

غرق اوْلدۇ گؤزل شوکتیمیز گؤز یاشێمێزدان

سروون یێخێلێب سایه کسیلدی باشێمێزدان

استاد رحیم منزوی اردبیلی

رقیّه حالاتی

عمّه بۇ ویرانسراده بیر دُرّ-ی-شاهانه‌یم من

سیز اگر بئش گۆن قوْناقسۇز بۇردا صاحب خانه‌یم من

شام قێزلارێ دئییرلر بۇ قێزێن یوْخدۇر آتاسێ

حالینی ائیلیر حکایت گؤزیاشێ کؤهنه لیباسی

نئیلیره‌م زردوز رختی، یۆزده رنگ-ی-زرد بسیمدیر

کؤهنه بیر پیراهنیله بۇ قارا معجر بسیمدیر

استاد منزوی

حضرت رقیّه نوحه‌سی(عمّه‌سینه سؤیله‌ییر)

اکبریم گلینجه اؤلسه‌م دفنیمی یۇباندێر عمّه

نعشیمی آلێب ال اۆسته، باشێنه دوْلاندێر عمّه

یوْخ سؤزۆم بۇ اؤلمه‌ک عمّه «امر حیّ‌ لم» یزل‌‌دی

باجێلار اؤله‌نده امّا قارداشێ اوْلا گؤزه‌لدی

ائیله‌یین بیر آزجا تأخیر، بلکه اکبریمده گلدی

کفن-وْ-دفنیمی بیر آز سن ساخلا ال یۇباندێر عمّه

گؤزلرون فداسی اوْللام خسته‌سن بی‌بی آز آغلا

اؤلدۆره‌ر اؤزۆن حَرَملر آز بۇ قلب-ی-زاری داغلا

اللرون قاداسێن آللام گل بۇ گؤزلریمی باغلا

قانلێ اشگیله‌ن سارالمێش رنگون آز بوْیاندێر عمّه

گرچه قاره گۆن الینده قۇرتارۇر بۇ بختی قاره

وار ولی بیر عمده دردیم، گل سنه ائدیم اشاره

ناگهانی گلسه اکبر، گؤزلریمی آچ دوباره

اکبری منیله بیر آن روبرو دایاندێر عمّه

شئمری سن چاغێرما عمّه قلبیده جراحتیم وار

قوْلدان آچماسێن طنابیم دیلده آیرێ نیّتیم وار

قبره قوْی بۇ حالتیله‌ن جدّیمه شکایتیم وار

سنده خلقه ظۆلم-ی-شئمری، نطقیویله آندێر عمّه

باشۇن آچما ائتمه ناله، قلبیم اوْلدۇ غۆصصه‌ده‌ن قان

سن منه آنالێق ائتدۇن جانیوه رقیّه قۇربان

باشێم آلما سینوْن اۆسته، توْپراق اۆسته قوْی وئریم جان

زحمتیمی چوْخ چکیبسه‌ن، آز منی اۇتاندێر عمّه

آغلاما دئمه غریب-ی-بی‌وطن، رقیّه لای‌لای

هئچ دیله گتیرمه جیسمی، بی‌کفن رقیّه لای‌لای

سسله شئمر-ی-شوم الینده‌ن، دینجه‌له‌ن رقیّه لای‌لای

قلب-ی-اهل-ی-شامی، آه-ی-آتشیمه یاندێر عمّه

بی‌سبب دئنه‌ن بۇ غمده قانه گؤز یاشێم دوْلانماز

الده اؤلدۆرۆب بۇ طئفلی شئمر-ی-دون گینه اۇتانماز

قمچیله‌ر یئرینی امّا گؤرمه‌یینجه خلق اینانماز

کؤینه‌گیم چێخارت بۇ خلقی سن اؤزۆن ایناندێر عمّه

استاد رحیم منزوی اردبیلی

حضرت زینب قارداشێنا جاواب وئریر

سرعتله اوْلما عازم-ی-مئیدان حسینیم صبر ائله

جانیم گئده‌ن یوْللارۇوا، قۇربان حسینیم صبر ائله

قارداش بیلیرسن هئجریوه یوْخ قلب-ی-زینبده دؤزۆم

هئجران غمینده تاب ائدیم آیا نه نوعی من دؤزۆم

سن بیل آنام زهرا دایان گئتمه حسینیم وار سؤزۆم

ائتمه بۇ نوعی قلبیمی آلقان حسینیم صبر ائله

لطف ائیله یوْل اۆسته بیرآز وقتۇن یۇباندێر گئت حسین

هر نه سؤزۆن وار زینب-ی-مظلومه آندێر گئت حسین

گل بۇ بلالی زینبی باشه دوْلاندێر گئت حسین

قوْیما دالۇنجا گؤزلری گیریان حسینیم صبر ائله

سؤز یوْخ شماتت منصبی بیر رشته‌ی-ی-ارزنده‌دیر

مین نیسگیل امّا گئیدیگۇن بۇ کؤهنه پیراهنده‌دیر

سلطانه کؤهنه پیرهن، آیا نئجه زیبنده‌دیر

ائتدی بۇ نیسگیل قلبیمی سوزان حسینیم صبر ائله

یوْلما دئییرسن زۆلفیوی، سس چکمه گلمه شیوه‌نه

بس نئیلئیوم من بی‌نوا، سن باری بیر فکر ائت منه

چون یئددی قارداشدان بۇ گۆن، گؤز تیکمیشه‌م من بیر سنه

سن‌سن اۇمیدی زینبین، الآن حسینیم صبر ائله

ای چشم-ی-حوره توتییا، خاک-ی-قدوم-ی-اطیبون

زهرایه خاطیر صبر ائله بیر لحظه ساخلا مرکبون

خنجر بوْغازۇن اؤپمه‌میش قوْی گلسین اؤپسین زینبون

زهرا سؤزۆنده قالماسێن نُقصان حسینیم صبر ائله

تاپشێرمێسان اطفالیوه مهر-وْ-نوازش گؤرسه‌دیم

سسلیر هامێ بیرده‌ن منی بیلمه‌م کیمه من سس وئریم

هانسێن آلێم آغۇشیمه، هانسێ بالانێ دیندیریم

بۇ ماجرایه قالمێشام حئیران حسینیم صبر ائله

وئر اذن اؤزۆم سردار اوْلۇم، بۇ جمع-ی-سرگردانه من

نظم-وْ-نظامیله‌ن چکیم، آل‌اللهی مئیدانه من

زۆلفۆم الیمده یالواریم، بۇ لئشگه‌ر-ی-عُدوانه من

تا بلکه سنده‌ن ال چکه عُدوان حسینیم صبر ائله

استاد رحیم منزوی اردبیلی

امام(ع) سوْن ویداعدا باجێسێ زینبه خیطاب ائدیر

ای خاندان-ی-عیصمته، زهرای ثانی زینبیم

آخر وداعیمدیر چاغێر، آل-ی-عبانی زینبیم

سلطانه دونیا تنگ اوْلار، انصار-وْ-یاوه‌رده‌ن سوْرا

جان-وْ-جهانی نئیلیره‌م، شئبه-ی-پیمبرده‌ن سوْرا

من ایچمه‌ره‌م دونیا سۇیۇن، شهزاده اکبرده‌ن سوْرا

لب تئشنه جان وئرره‌م تاپام آب-ی-بقانی زینبیم

دۆزدۆر چوْخ آغلار دهریده، بی‌کس باجێ قارداشێنا

امّا باجێ سن چوْخ اؤزون غرق ائیله‌مه گؤز یاشێنا

الله ریضاسی سن فقط، ال چک رقیّه‌م باشێنا

ساخلا اؤزون نازیله اوْل نازلێ بالانێ زینبیم

چوْخ آغلایێب آغلاتما سن بۇ دیده‌ی-ی-خونباریمی

آخر وداعیمده‌ن اؤزون آگاه ائله قێزلارێمێ

یێغ باشێما باشسێز قالان اطفال-ی-گۆل روخساریمی

ائعلان ائله بۆلبۆل‌لره فصل-ی-خزانی زینبیم

تئز-تئز یانێقلێ آهیله‌ن گؤینه‌تمه قلبیم یاره‌سین

قێزلارێ سسله ایندیده‌ن ائیله سوْیۇلماق چاره‌سین

بیربیر سوْیۇندۇر جامه‌سین، رأفتله آل گوشواره‌سین

گئیدیر دوباره اگنینه کؤهنه قبانی زینبیم

باجێ یئتیر پئیغامیمی اؤز عتره‌تیمه جابه‌جا

اوْلسۇن اسیر اوْلماغلێغا، آماده آل-ی-مصطفیٰ

من کؤهنه کؤینه‌ک گئیمیشه‌م سیزده گئیین کؤهنه قبا

قوْیماز بۇ لئشگه‌ر، چادُر-ی-زرّین نیقابی زینبیم

بیرده آماندێر زینبیم باش یوْلما مقتلده منه

شامه گئده‌نده باش آچێق لازیمدی اؤز زۆلفۆن سنه

تؤک زۆلفیوی روخساریوه قوْیما جمالون گؤرسه‌نه

چون مه یۆزۆن ائیله‌ر خجل شمس-ی-هُدانی زینبیم

سن‌سن پرستاری باجێ باشسێز قالان اولادیمێن

سن‌له‌ندی هر دردسری بۇ عترت-ی-ناشادیمین

شامێن یوْلۇندا جان سنین جان سیّد-ی-سجّادیمین

قوْیما اوْنا ایذا ائده، شئمر-وْ-سنانی زینبیم

دوشمن وۇراندا قێزلارێ قوْللارۇوۇ ائیله سپر

قوْیما اوْلارێ اینجیده، بۇ کوفیان-ی-بد سیَر

شئمرین الینده قمچیسی، گؤرسه رقیّه‌م غش ائده‌ر

بیر آه چکسه آغلادار، اهل-ی-سمانی زینبیم

استاد رحیم منزوی اردبیلی

حضرت رقیه(س) نوحه‌سی

بهار-ی-عُمریمین بابا گؤره‌نمه‌دیم نتیجه‌سین

آتاسێ اوْلمایان قێزێن علاجی یوْخدۇ نئیله‌سین

گئدیب کیمین چیراغێنێن دالێندا قالسێن اؤلمه‌سین

مینایه گئتمه گل بابا بیزی آپار مدینه‌یه

گئجه‌لر اۆز قوْیۇم یاتێم بابا من هانسێ سینه‌یه

استاد رحیم منزوی اردبیلی

روباعی‌لر– امام(ع) قێزێ رقیّه‌یه سؤیله‌ییر

ایسته‌کلی رقیّه‌م غم اوْدۇن جانیمه وۇرما

عطشان بالا گئت خئیمییه یوْل اۆسته اوْتۇرما

زهراء آناما گؤزلرۆن اوْخشار، یاراشێقدا

وار گؤزلییه‌نیم منله قێزێم گؤز-گؤزه دۇرما

***

سن تک بالا منده یانێرام غم‌لر الینده

قاتل تله‌سیر قتله یالێن خنجر الینده

سن گئتمه دئییرسن بالا اصغر منی سسله‌ر

زهراده تیکیبدیر یوْلا گؤز معجر الینده

***

واردۇر هدفیم مقصده گر یئتمه‌سم اوْلماز

قرآن گئدیر الده‌ن، سیزی ترک ائتمه‌سم اوْلماز

افطاره آنام فاطمییه منده قوْناغام

دعوت منه خاطیردی اگر گئتمه‌سم اوْلماز

حضرت رقیّه‌نین جاوابی:

سؤز یوْخ بابا زهرا قوْناغێن ساخلاماق اوْلماز

دوشمن سؤیۆنه‌ر، گؤرسه بیزی آغلاماق اوْلماز

چاره‌م کسیلیب دۇتمۇشام الآن اته‌یوندان

چاره یوْلۇنۇ چاره‌سیزه باغلاماق اوْلماز

استاد رحیم منزوی اردبیلی

حضرت رقیه(س) باباسێنا سؤیله‌ییر

اؤلۆب اکبریـم آمـانـدێر، بابـا کارزاره گئتمـه

منی باشۇوا دوْلاندێر، اؤلۆره‌م کناره گئتمه

دؤزه بیلمیره‌م من اؤللـه‌م گئده‌‌سن اگر اۇزاغه

آتا اؤلسه گر یتیمه قێزێ کیم آلار قۇجاغه

گره‌ک اوْندا قێزلار ایچره باشێمێ سالام آشاقه

بابا جان ترحّم ائت بۇ دل-ی-بی‌قراره گئتمه

سنیله‌ن بۇ رزمه گئتدی نئجه راحت اوْلدۇ اصغر

منی ده گل آل قۇجاغه، آپار اوْخلاسۇن بۇ لئشگه‌ر

منی شامێن اهلی سن‌سیز، بابا الده اؤلدۆره‌رلر

چکه‌ر آیرێلێق اوْدۇندان اۆره‌گیم شراره گئتمه

گؤرۆره‌م قایێتمایێبدێر گئده‌ن عرصه‌ی-ی-جیداله

اوْدۇر ائیلیره‌م بۇ قدری قاباغۇندا آه-وْ-ناله

ائشیدیب فراقۇن عمّه‌م گؤرۆسن قالێب نه حاله

الی سینه‌ده سرشگین تؤکۆرۆ عذاره گئتمه

بیله شئمر اگر سنین من، قێزۇوام عداوت ائیله‌ر

آپارێنجا شام-ی-شومه، منی اؤلدۆره‌ر اوْ کافر

بیزی اوْلسا گر دوباره وطن-وْ-دیاره قَیته‌ر

بۇ عزالی امّهاتی، ائله فکر-وْ-چاره گئتمه

بئله کی قوْیۇب گئدیرسن بۇ پناهسیز بناتی

دئ گؤرۆم سوار-ی-ناقه کیم ائده‌ر مخدّراتی

سۇ گتیرمه‌گه بهانه، ائدیسه‌ن اگر فراتی

سۇ آدێن گتیرمه‌ره‌م من، دیلیمه دوباره گئتمه

سنین آی بابا اگرچه اۆره‌گۆن دوْیۇبدۇ منده‌ن

نئیله‌سین رقیّه‌وْن آخر، هله دوْیمئییبدی سنده‌ن

سنین عئش-وْ-التفاتون، آیێرێب منی وطنده‌ن

چکر ایندی داغ-ی-هئجرون دل-ی-داغداره گئتمه

بئله کی شتابیله‌ن سن، من تک قوْیۇب گئدیرسن

من-ی-زاری اوْلما راضی ائله‌سین اسیر دوشمن

قێل اؤزۆن دعا اقلا" سن اؤلۆنجه قوْی اؤلۆم من

غم-ی-هئجرون ائتمه‌سین تا، منی بخت-ی-قاره گئتمه

استاد رحیم منزوی اردبیلی

امام(ع) قێزێ اێلان وداع ائدیر 2

قێزێم ایستیره‌م سیزی ترک ائده‌م

سفر اۆسته آغلاما قوْی گئدیم

منی چوْخ یۇباتما گره‌ک گئده‌م

سفر اۆسته آغلاما قوْی گئدیم

سنیله‌ن گره‌ک گئده شامه بۇ

گۆنۆ قاره خاطیری رنجه‌لر

اؤپه‌جک بۇ قوْللارێوێ هله

گره-ی-طناب-ی-شکنجه‌لر

یێخاجاق یزیدی دمشقیده

یئره ذلّتیله بۇ پنجه‌لر

اوْلاجاق عمارتی مُنهدم

سفر اۆسته آغلاما قوْی گئدیم

منی ساقی-ی-ازل ائیله‌ییب

بئله مست-ی-بزم-ی-الست-ی-حق

بوْغازێم قانێلا مرمّته

یئتیشه گره‌کدی شکست-ی-حق

سنی قوْرخما وۇرسا بۇ کوفییان

آلار انتقامیوی دست-ی-حق

آرادا خدا اؤزۆدۆر حَکَم

سفر اۆسته آغلاما قوْی گئدیم

آلاسان نتیجه قێزێم گره‌ک

سن اؤزۆن بۇ قانلێ قییامیده‌ن

سالاسان بنای-ی-حکومت-ی

اُمَوینی نظم-وْ-نظامیده‌ن

بۇ بلالی باشێمێ سن گره‌ک

آلاسان حکومت-ی-شامیده‌ن

اؤپه‌سن دوْداغێمێ دمبدم

سفر اۆسته آغلاما قوْی گئدیم

هله گئت گؤرۆم قۇرۇسان نئجه

منه بزم-ی-تعزیه شامیده

سنی دیندیره‌ن گره‌ک آغلایێب

یانا وای حسین دییه شامیده

ائده لعنت آل-ی-اُمییه

علنی قرا گییه شامیده

وۇرالار هر ائوده قارا علم

سفر اۆسته آغلاما قوْی گئدیم

منی چوْخ یۇباتما گئت عمّه‌وه

بیلیسه‌ن کی خسته مسافرم

نه اؤزۆم سۇ ایچمه‌گه طالبم

نه ده زنده قالماغا قادرم

ولی سۇ تاپێلسا اگر قێزێم

گینه من گتیرمه‌گه حاضرم

ائده‌رم سۇ فکرینی هر قده‌م

سفر اۆسته آغلاما قوْی گئدیم

اوْ قێزێن سوْلان یۆزۆنه باخێب

یۆزه سئیل-ی-اشگینی باغلادێ

دیزی اۆسته باشینه ال چکیب

آنا آغلادێ بالا آغلادێ

بالانێن سیلیب گؤزۆنۆن یاشێن

یۆزۆن اؤپدۆ بیرده قۇجاخلادێ

دئدی صبر ائله قێزێم ائتمه غم

سفر اۆسته آغلاما قوْی گئدیم

استاد رحیم منزوی اردبیلی

امام(ع) قێزێ اێلان وداع ائدیر 1

سن آت اۆسته پای-ی-پییاده من

نــه قــده‌ر قـاچێـم دایـانێــم بـابـا

سنـی عمّه‌میـن جانـی بیر دایان

بــاشــۇوا گلیــم دوْلانێــم بــابــا

بۇ یوْل اۆسته ایستیره‌م اگله‌شیب

سنه بیرجه درد-ی-دل ائیلییه‌م

اؤلۆم ایسته جانێمێ قۇرتارۇم

داخێ سن‌سیز عالمی نئیلییه‌م

دئمه گوشواره‌می آلمۇسان

اۆره‌گیم سێنێبدی گیلئیلییه‌م

نه قده‌ر مصیبته تاب ائدیم

نه قده‌ر دؤزۆم دایانێم بابا

دایان ایندی قلب-ی-شریفیوی

بۇ یانێقلێ آهیله داغلا گئت

دؤشه‌نیم آیاغۇوا اؤلمه‌میش

باشێم اۆسته اگله‌شیب آغلا گئت

گئدیسه‌ن دالونجا باخانمێرام

ائله گؤزلریمی ده باغلا گئت

گؤزۆ باغلێ دۇت الیمی اؤزۆن

باشۇوا دۇرۇب دوْلانێم بابا

باشێمێ اۇجاتمێشێدێ منیم

باباجان بۇ سایه‌ی-ی-رحمتون

هامۇدان علاوه بۇ بی‌کسه

وارێدێ همیشه محبّتون

منه نسبت ایندی نده‌ن بئله

آزالێبدێ لطف-وْ-کرامتون

بۇ اَسفلی آیرێلێغێ مگر

نئجه ایندی سهل سانێم بابا

بۇ یوْل اۆسته من اوْتۇرۇم بابا

پوْزۇلان بۇ حالیوه آغلایێم

باشۇوا و یا دوْلانێم سنین

داغێلان جلالیوه آغلایێم

منی آل قۇجاغۇوا یۆز قوْیۇم

سارالان جمالیوه آغلایێم

اوْلا سینوْن اۆسته فدا سنه

یوْرۇلان ضعیفه جانیم بابا

وئر اجازه شئمره گئدیم دئییم

اۆره‌گیزده کینه‌نی اؤلدۆرۆن

نه یانێن شراره‌ی-ی-دوزَخه

نه ولیّ‌ ذوالمنی اؤلدۆرۆن

سنی گؤرسه‌دیم قوْشۇنا دئییم

بۇنۇ بوْشلایێن منی اؤلدۆرۆن

علی‌اصغریم کیمی اوْخلانام

سپه‌سن سمایه قانێم بابا

سؤزۆمۆ قبول ائله هیجر اوْدۇن

بابا خسته قلبیمه وۇرما سن

قوْی علیّ‌-ی-اصغریله یاتێم

منی آغلادێب بئله یوْرما سن

گؤتۆر ال دعا ائله قوْی اؤلۆم

منی اصغریمده‌ن آیێرما سن

دئمه‌سین هایاندا قالێب منیم

گئجه لای‌لای چالانێم بابا

بیلیسه‌ن محبّت اسیری‌یم

آتاسێزلێغا دؤزه بیلمیره‌م

منی سن سینوْندا بؤیۆتمۆسن

اته‌یوندان ال اۆزه بیلمیره‌م

سوْیۇنۇب بۇ شامێن اۇزاق یوْلۇن

من آیاق یالێن گزه بیلمیره‌م

گۆلۆ خاره تاپشێرێسان نئجه

دایانێم بۇ اوْددا یانێم بابا

استاد رحیم منزوی اردبیلی

بیر نچه روباعی استاد منزوی دن

گئچه‌ن گئجه محنت اوْدۇندا یاندێم

سۇدان اؤترۆ خئیمه‌لری دوْلاندێم

بختیم کیمی دۇنیا گؤرۆم هئچ اوْلسۇن

دۆشدۆ گؤزۆم گؤزلریوه اۇتاندێم

***

بۇ دونیانێن وفاسینی گؤرمه‌دیم

جفا چکدیم صفاسینی گؤرمه‌دیم

اۆچ شُعبه‌لی اوْخۇن آدێن ائشیتدیم

بوْغازۇوۇن یاراسێنێ گؤرمه‌دیم

***

آیاق دۇتۇب یوْل قاچماغۇن گؤرمه‌دیم

شیرین-شیرین  دانێشماغۇن گورمه‌دیم

یاننام بالا بۇ نیسگیله اؤلۆنجه

دیلسیز گئتدۇن دیل آچماغۇن گؤرمه‌دیم

***

رحم اوْلمادێ بۇ لئشگه‌ر-ی-ستمده

بیر جُرعه سۇ تاپێلمادێ خییَمده

صبحه کیمی گؤز یۇممادۇن سۇسۇزدان

دیرناغۇوۇن ردّی قالێب سینه‌مده

استاد رحیم منزوی اردبیلی

رباب(س) بالاسێن اوْخشایێر

ای غۆنچه دهن لای‌لای، پئکانی امه‌ن لای‌لای

قبری ننـه‌ده‌ن گیـزلیـن، قوْنداغـێ کفن لای‌لای

لای‌لای گؤزه‌لیم لای‌لای، شیرین غزه‌لیم لای‌لای

یاز گۆنلری گۆل وقتی، سوْلمۇش خزه‌لیم لای‌لای

آخر گئجه سینه‌مده بیر حالدا سارلمێشدۇن

چون شمع-ی-شبستانی یاندۇقجا آزالمێشدۇن

بیلدیم سَحَره خاطیر، جبرا" دیری قالمێشدۇن

بیلمه‌زدی ندیر دردون سؤیله‌ردی گؤره‌ن لای‌لای

آشفته هواسیله، فکریم کیمی مختلّم

هر آن اؤزۆمۆ تاپسام بیلسه‌م یئریوی گلله‌م

بیر آز سۆد امیب، یاتسوْن منده بالا دینجه‌للـه‌م

خوْشدۇر دوْیا دلبندون اوْندان دییه‌سن لای‌لای

نسبت آنا عئشقینده بیر ذرّه مجاز اوْلماز

قانلێ دوْداغۇن اؤپسه‌م جان نقدینه آز اوْلماز

کیم بیلمیره‌م اؤرگه‌تدی، سنده بئله ناز اوْلماز

آغلا سسیوه قۇربان چاللام تزه‌ده‌ن لای‌لای

شش‌ماهه‌میله بئش آی گزدیم نئجه داغ داشدا

ال گاه دعادئیدی، گه سینه‌ده گه باشدا

اللیک قوْچ اوْلار قۇربان، هئچ اوْلماسا بیر یاشدا

اللیک یئرینه املیک قۇربان کسیله‌ن لای‌لای

هر گۆن نئچه یوْل اوْغلۇم، منده‌ن سۆد امه‌ردۇن سن

دوْیجاق منه هر لحظه نازیله گۆلردۇن سن

آرتێق سۆدۆ آغزۇندان اطرافه سپه‌ردۇن سن

تئز-تئز سنی اوْخشاردێم قۇربان سنه من لای‌لای

یادیمه دۆشه‌ر یاروْن هر دم دییه‌ره‌م جان-جان

اوْلمادێ سۆدۆم منده‌ن اوْلدۇن بئله روی‌گردان

لب تئشنه چێخان جانه، شرمنده ننوْن قۇربان

قوْیدۇن منی چؤللرده یات قبریده سن لای‌لای

آغ دؤشلۆگ اوْلار طئفله، پاکیزه برازنده

داشلانسا سۆد آغزێندان سالماز لکه روبنده

آغزۇندان آخێب قانۇن ای آهوی-ی-زیبنده

سینوْندا چیچه‌ک بیتمیش خنداندی چمن لای‌لای

استاد رحیم منزوی اردبیلی

روباعی‌لر استاد منزوی‌دن

من ربابم آغلاماقدان دوْیمارام

اؤلۆنجه من بۇ قاره‌نی سوْیمارام

مدینه‌نین خانیملارێ دینمه‌یین

عزالیام باشا حنا قوْیمارام

***

من ربابم فاطمه‌نین گلینی

اوّل دئدیم بلالره بلینی

بۇ نیسگیله اؤلۆنجه من آغلارام

اصغریمین باغلامێشدێم الینی

***

درک ائتمه‌دیم اشاره‌وی دوْیۇنجا

اوْخشامادێم اوێخ یاره‌وی دوْیۇنجا

دیلسیز گئتدۇن سنه دیل اؤرگه‌تمه‌دیم

ترپه‌تمه‌دیم گهواره‌وی دوْیۇنجا

***

من ربابم دییه‌ره‌م دردیمی هر آن بالاما

آغلارام شام-وْ-سحر دیده‌سی گیریان بالاما

هر زامان دۆشسه منیم یادیمه هیجران گئجه‌سی

ائیله‌ره‌م صبحه کیمی ناله-وْ-افغان بالاما

قوْشار: استاد رحیم منزوی اردبیلی

حضرت علی اصغر(ع) و آناسێ رباب

اوْد یاپێشدێ سینه‌مه، لب‌لروندان اصغریم

بوْشلا دؤشله‌ریم، اؤپۆم اللروندان اصغریم

قوْی سارالمێش عارضون سینه‌مه یاپێشدێرێم

اوْدلۇ یۆز گۆزۆنله، بیر سینه‌می آلێشدێرێم

کۆسمه منّتون چکیم، قوْی سنی دانێشدێرێم

لذّت ائله‌ییم شیرین دیللروندان اصغریم

من نه قدری قلبیمی غۆصصه‌ده‌ن اوْوۇشدۇرۇم

لب‌لرون نئجه قۇرۇ دؤشله‌ریمه یوْوۇشدۇرۇم

صبحه‌جک گره‌ک بئله وقتیمی سوْوۇشدۇرۇرم

بلکه صبح اوْلا فرج داوَروندان اصغریم

ایلده‌ن آرتێق اوْلدۇ بۇ آخرین گئجوْن منه

اوْلمادێ دیلون اوْغۇل یاننام آغلارام سنه

آخ نئجه دییه‌نمه‌دۇن چاره، یاندێم آی ننه

حشره‌جک یانام گره‌ک نیسگیلوندان اصغریم

چوْخ اۇزاندێ از قضا، صبح اوْلۇب همان گئجه

گلدی تیر-ی-«حرمله» چاتدێ قالمادێ گئجه

قان ایچینده اصغرین گؤردۆ بینوا نئجه

وای دئدی نه قان سۆزۆر تئللروندان اصغریم

هر گۆل اکدیم ای گۆل! گۆلۆستانه سرمه‌دیم

یاز گؤرۆب آیاز گؤرۆب بیرجه شاخه درمه‌دیم

پرپر اوْلدۇ گۆل بالام، مخمل اۆسته سرمه‌دیم

توشه اخذ ائده‌نمه‌دیم گۆل پروندان اصغریم

هانسێ سۆد امه‌ر یئتیب بئیله نکته‌سنجییه

قاتلیله روبرو قوْیدۇ پنجه-پنجه‌یه

یاخشێ طاقت ائیله‌دۇن اوْخ وئره‌ن شکنجییه

وئر اجازه من اؤپۆم حنجروندان اصغریم

تئشنه‌لیک آغارتدێ گۆل صورتون ایپک کیمی

باغرێنا باسێب آنوْن هئی سنی اۆره‌ک کیمی

ایندی قانلێ صورتون رنگ آچێب چیچه‌ک کیمی

گۆل یۆزۆن صفالیدی، پئکروندان اصغریم

باخسا «حرمله» دئدیم قصّه‌ی-ی-درازیوه

نرم اوْلار یاواش-یاواش قلبی سوز-وْ-سازیوه

باغلێ گؤرسه قوْللارۇن آتماز، اوْخ بوْغازێوه

شرم ائده‌ر اوْ باغلانان شهپروندان اصغریم

قوْشار: استاد رحیم منزوی اردبیلی