نوحه علی اکبر(ع)

ائی بۇ غریبی سسلی‌یه‌ن، ایمداده گلدیم آچ گؤزۆن

قان ایچره یاتما نازیله‌ن، شهزاده گلدیم آچ گؤزۆن

بیر-بیر کؤمه‌کله‌ر گئتدیله‌ر، قالمادێ کیمسه داد-ی-رس

ائیله‌ر سنین گوفتاریوه، بۇ موْرغ-گؤگلۇم چوْخ هوه‌س

قوْیدۇن گؤزۆ یاشلێ منی، ورئ بۇ سسیمه بارێ سس

ائی ظۆلم الیله دوْغرانان، فریاده گلدیم آچ گؤزۆن

وصلوندان ائتدیله‌ر منی، بۇ اهل-ی-کین محروم اوْغۇل

قان آغلاسام واردێر یئری، من بیکه‌س-وْ-محروم اوْغۇل

هانسێ جوانی سن کیمی اؤلدۆردیله‌ر مظلوم اوْغۇل؟

بۇ نوْعی وئرمیب کیمسه جان، دونیاده گلدیم آچ گؤزۆن

بۇ قدر زحمه‌تله‌ن اوْغۇل، ایستی قۇم اۆسته ائتمه خواب

‌آرتار یارانێن سوزئشی، هر زخمه دۆشسه آفیتاب

توْادۇ اوْ شیرین دیلله‌رین، گل نۆطقه بیرده‌م وئر جواب

هر چند زخمین گلمیری، تئعداده گلدیم آچ گؤزۆن

باتسێن گره‌ک اهل-ی-حره‌م، یئکسه‌ر قارایا آغلاسێن

وئرسین آنانلا عممه‌له‌ر، صدا-صدایه آغلاسێن

«لیلا» اؤلۆنجه روز-وْ-شب، بۇ ماجرایه آغلاسێن

تۆش اوْلمۇسان بیر سنگدیل، جلاده گلدیم آچ گؤزۆن

آرامێدێ صوْبح-وْ-مساء، سنله‌ن «علی» قلب-ی-حزین

تؤکدۆ سیته‌مله قانێوێ، قوْم-ی-جفارکار؛ اهل-ی-کین

قوْیدۇن بئله تنها منی، گئتدین اؤزۆن ائی مه جبین

یوْخدۇر یئته‌ن ایمداده بۇ، صحراده گلدیم آچ گؤزۆن

باشێن یاراسێ بنزیری، زخم-ی-شه-ی-مردانیمه

هر اوْخ دگیبدیر سینه‌وه، دگمیش دیل-ی-سوزانیمه

ائیله‌رلــه‌ر آخه‌ر سن کیمی، غلطان منی اؤز قانێمه

قاتیلله‌ریم صف-صف دۇرۇب، آماده گلدیم آچ گؤزۆن

سنده‌ن سوْرا قوْیماز منی، آسۇده بۇ اهل-ی-سیته‌م

جور-وْ-جفاسین آرتێرێر، ساعه‌ت به ساعه‌ت؛ دم به دم

تئشنه کسه‌رله‌ر باشێمێ، باشسێز قالار اهل-ی-حره‌م

باشێم گئچه‌ر هم نئیزه-وْ-فۇلاده گلدیم آچ گؤزۆن

گۆل جیسمین اوْلدۇ ناوه‌ک-ی-پئیکانه بۇ نوْعی نیشان

گاهێ وۇرۇبلار تیغ-ی-کین، گه خنجه‌ر-وْ-تیغ-وْ-سنان

آهۇی-ی-زخم خوْرده تک، صئید اوْلدۇن ائئ تازه جوان

صئید اوْلمایان چوْخ زخم‌سیز، صیاده گلدیم آچ گؤزۆن

قێللام نظاره جیسمیوه، بیر جای-ی-بوسه یوْخ منه

بسکی وۇرۇب اهل-ی-جفا، ای سرو-ی-قد؛ یاره سنه

اوْلمۇش سراپا قامه‌تێن، زخمیله روْزه‌ن-روْزه‌نه

یۆز وئردی یۆز غم بۇ دیل-ی-ناشاده گلدیم آچ گؤزۆن

زۆلفۆن تئلینده قطرئی‌-ی-آلقان، دۇرۇب مرجان کیمی

سینه‌نده صف-صف ناوه‌ک-ی-پئیکانیله‌ر موْژقان کیمی

یاره نئجه یاره آچێب، گؤز لاله‌ی-ی-نوْعمان کیمی

بنزه‌ر قدین بیر سرنیگون، شیمشاده گلدیم آچ گؤزۆن

کرب-وْ-بلا ده یا حۆسئین، سوْلدۇ سیته‌مله گۆللـه‌رین

دۆشدۆ جفای خاریده‌ن، دیلده‌ن هامێ بۆلبۆللـه‌رین

«دیلریش» دئییر بۇ نوؤحه‌نی، یاده سالێر نیسگیلله‌رین

ائی بۇ غریبی سسلی‌یه‌ن، ایمداده گلدیم آچ گؤزۆن

شاعر: دلریش

نوحه حضرت قاسم(ع)

کسمه باشێمێ ظالێم، قوْی عـزیز-ی-جـان گلسیـن

جان یئتیب دوْداغێمه، شاه-ی-اینس-وْ-جان گلسیـن

قان ایچینده غلطانه‌م، بسکی زخم-ی-کاریم وار

گؤزله‌ریم قالێب یوْلـدا، چـۆنکــی اینتیظاریــم وار

گلمه‌یینجه جان وئرمه‌م، بیرجه غمگوْساریم وار

اوْل قده‌ر منه مؤهله‌ت، وئر اوْ مئهریبان گلسین

زخمـدار آهــویــه، رحــم ائــده گـــره‌ک صییــاد

ال گــؤتۆر شقاوه‌تده‌ن، ائتمــه بۇ قــده‌ر بیــداد

حلقیمه منیم هردم، چکمه خنجه‌ر ائی جـلـلاد

ساخلا ال بۇ مؤحنه‌تده‌ن، باغرێقان اوْلـان گلسین

موْرغ-ی-بئسمئله‌م، جیسمیم سربئسه‌ر جراحه‌ت دیر

چۆن بۇ نوْعی جان وئرمه‌ک، بیزلــه‌ره سعــاده‌ت دیــر

من ال اۆزمیشه‌م جاندان، سن ده نه شقاوه‌تــدیـــر

قوْیمۇسان باشێم اۆسته، شاه-ی-بیکه‌سان گلسین

سن‌سن ائی شه-ی-کۆنه‌‌ین، هر قولوبیده‌ن عاله‌م

پرشیکه‌ستــه بۆلبــۆل تــک، سێنــدێ بۇ پر-وْ-باله‌م

وئرمیری منــه مؤهلــه‌ت، ســن گلینجــه بــۇ ظالێـم

هرچی سعیی قێللام قوْی، سروه‌رئ جاهان گلسین

یۆز قوْیۇبـدۇ بیــر اوْوچـــۇ، بیـر شیکــاره یــۆز یئـــرده‌ن

واردێ جیســم-ی-زاریمده، کــاری یــاره یـۆز یئــرده‌ن

یۆز گــؤتـۆرمیــره‌م یئـرده‌ن، گلسـه چـاره یۆز یئــرده‌ن

تئز گل ائی مسیحا دم، موْرده جیسمه جان گلسین

اوْل قده‌ر آخێب قانێم، خاک-ی-خون اوْلۇب فرشیم

آز قالێب عمو اوْلسۇن، نوک-ی-نئیــزه‌له‌ر عـرشیــم

آتــــلارێــــن ایــــاغێنـــدا، پایمـــال اوْلــۇر نعشیـــم

جان وئرئیدیم آسـۇده، قــانێمـــێ آلـان گلسیـــن

درک ائدیب سسین وئردی، سس سسینه جان گلدیم

قــوْیمــادێ سســۇن منــده، طــاقــه‌ت-وْ-تــوان گلــدیم

زیــر-ی-تیــغ-ی-قــاتیلـــده، لحظـــه ای دایــان گلــدیــم

بئلــــه وقتــــه لازیمــــــدیر، بیر قــدی کمــان گلسیـــن

ناگـه‌هـان یئتیـب اوْل شـه، گؤردۆ قانا غلطان دیـر

قطره-قطره زولفونده، قانێ میثـل-ی-مـرجان دیـر

سرو قددی صـد پـاره، یئـرده زیب-ی-مئیـدان دیـر

قان ایچینده ورد ائیلیب، قوْی عموم امان گلسیـن

آچدێ قانیله‌ن دوْلمۇش، گؤزله‌رین اوْ شهزاده

عرض ائدیب عمو گلدین، یاخشێ وقته فریاده

دستگیــریلیـک ائتــدین، دستگیــر-ی-جـــللاده

وار یئری بۇ احوالیم، چوْخ سنه گیران گلسین

یا حۆسئن سنه دلریش، صیدقیله دۇتۇب اۇمــۇد

کلـب-ی-آستـانــۇنــدۇر، ائتگیلـــه‌ن اؤزۆن تــأییــد

کیم اوْلۇب بۇ درگه‌هـده، ایندی‌یـه کیمـی نامـیـد

ایسته قبریوه بۇ جمع، جومله باغرێقان گلسیـن

شاعر: دلریش

نوحه حضرت قاسم(ع)

آتــدان عمو یێخێلــدێم، باشــدان آشێـب بـلا گـل

باشێم کسیلمه‌‌میش ائی سولطان-ی-کربلا گـل

بسکی اوْخۇ اوْخ اۆسته، بۇ اهل-ی-کین وۇرۇبلار

ساغ-وْ-سوْلۇمدا صف-صف، قاتیـللـه‌ریم دۇرۇبـلار

پران دگیـب آچێـب پـر، سینــه‌مــی دوْلـدۇرۇبــلار

ائیله‌للــه لحظـه-لحظـه، مـن بیکــه‌سـه جفـا گل

گۆن ایستی قانێم ایستی، بۇ یاتدێغێم یئر ایستی

تاثیر ائدیـب حـراره‌ت، صــد پـاره پئیکـــه‌ر ایستــی

دگدیکجه گۆن سیزیلله‌ر، جیسمیم سراسه‌ر ایستی

بیر یان جفـای دۆشمــه‌ن، بیــر یـــانــدا بــۇ هــوا گــل

هیـجـرونـدا دود-ی-آهێــم، بـۇ گـؤیلــه‌ره دایـانـدێ

جانێم عطه‌ش اوْدۇندا، ایستی قۇم اۆسته یاندێ

اؤز قانیمیـلــه جیسمیـــم، مئیــدانیــده بــوْیانـدێ

مـن قێـرمێـزی گئییندیـم، سالسێـن آنـام قارا گل

شاهــا بــۇدۇر مـرامیــم، بلکــه تاپێــم سعــاده‌ت

آخـه‌ر نفـه‌سـده بیــرده، ائیلیــم سنــی زییــاره‌ت

مومکون دگیل گله‌م من، قالمۇبـدێ تاب-وْ-طاقـه‌ت

سن باشێم اۆسته گلسوْن، چئشمیم تاپار ضییا گل

فرماییش ائتدی گلدیم، امما اوْغۇل نه حاصیل

اوْلمادێ بیر کؤمه‌کلیک، اوْلدۇ دۇباره نیسگیل

سنده‌ن منی خیجاله‌ت، ائتدی بۇ قوْم-ی-باطیل

وجهی ندیر دئییرسه‌ن، باشدان آشێب بلا گل

شاعر: دلریش

جناب علی‌اکبره‌ آتاسێ دیلیجه نوحه

ای گـۆل کیمـی قانــه باتـان

اکبریم اوْیان، یاوه‌ریـم اوْیـان

قــان ایچــره نــازیـلـه یـاتـان

اکبریم اوْیـان، یاوه‌ریـم اوْیـان

خئیمه‌لره گلدی سسین

گلدیم اوْلام دادرسین

اؤلمه‌میسه‌ن وار نفسین؟

اکبریم اوْیـان، یاوه‌ریـم اوْیـان

ای کشته‌ی-ی-تیغ-ی-ستم

هئجرین ائدیب قدّیمی خم

گؤزله‌ر یوْلۇن اهل-ی-حرم

اکبریم اوْیـان، یاوه‌ریـم اوْیـان

شام ائتمه لئیلا گۆندۆزۆن

چوْخ منتظر قوْیما گؤزۆن

ایندی هلاک ائیله‌ر اؤزۆن

اکبریم اوْیـان، یاوه‌ریـم اوْیـان

ای سرو-ی-گۆل پیرهنیم

باغ-وْ-بهشت-وْ-چمنیم

سن‌سیز گۆلۆم سوْلدۇ منیم

اکبریم اوْیـان، یاوه‌ریـم اوْیـان

سن منه بیر یوْلداشیدین

آغلار گؤزۆمده یاشیدین

هم اوْغۇل هم قارداشیدین

اکبریم اوْیـان، یاوه‌ریـم اوْیـان

توْپراقلارا قوْیما یۆزۆن

دۇر دئ منه اۆره‌ک سؤزۆن

آچ بیرجه اوْ قانلێ گؤزۆن

اکبریم اوْیـان، یاوه‌ریـم اوْیـان

گلدیم جیگر داغلاماغا

اوْغۇل دئییب آغلاماغا

گؤزلریوی باغلاماغا

اکبریم اوْیـان، یاوه‌ریـم اوْیـان

قالمێش الیم اۆسته الیم

باشه یئتیب چون اَجلیم

صبر ائیله قوْی منده گلیم

اکبریم اوْیـان، یاوه‌ریـم اوْیـان

تیغ-ی-جفا خامه کیمی

جیسمون یازێب نامه کیمی

سنله‌ن وارام شامه کیمی

اکبریم اوْیـان، یاوه‌ریـم اوْیـان

صرّاف-ی-دینار-ی-غمم

نقّاد-ی-نقدی-ی-اَلمم

بۇ سؤزده ثابت قدمم

اکبریم اوْیـان، یاوه‌ریـم اوْیـان

قوْشار: صرّاف

نوحه حضرت علی اکبر

یارالاندێم ای شه-ی-کربـلا

اؤلـۆره‌م هـراییمـه گـل بابا

اوْ گلـه‌ن قــدم‌لــریـوه فــدا

اؤلۆره‌م هـراییمـه گــل بابا

یئتیشیب وجودیمه اوْخ زبس

داغێلێبدێ سینه باتێب نفس

بۇ نفسده وئر منه بیرجه سس

اؤلۆره‌م هـراییمـه گــل بابا

سنه چون یئتیب چوْخ اذیّتیم

اوْدۇ چـوْخ وارێمدێ خجـالتیـم

بـــۇدۇر اوّل آخــــر زحـمتیــم

اؤلۆره‌م هـراییمـه گــل بابا

منی قصد ائدیبدی گلیر اجل

بۇدۇ فکری درک ائده ال به ال

اوْ گلینجه سن باشێم اۆسته گل

اؤلۆره‌م هـراییمـه گــل بابا

بۇ گۆن ایستی‌سی بۇ جیگرده سوز

عطشیم دمادم ائده‌ر بروز

بدنیم یارالێ اؤزۆم سۇسۇز

اؤلۆره‌م هـراییمـه گــل بابا

بابا وِردی ذکریم اوْلۇب «تَعال»

منی گل بۇ حالیده یاده سال

باشێمێ گؤتۆر دیزین اۆسته آل

اؤلۆره‌م هـراییمـه گــل بابا

بده‌نیم یارالارێ قان وئریر

بۇ قان اؤزگه حالی نیشان وئریر

بابا گل گؤر اوْغلۇوۇ جان وئریر

اؤلۆره‌م هـراییمـه گــل بابا

بابا ائیله اکبریوه کرم

یوْلا گؤز تیکیب سنی گؤزله‌ره‌م

باشێم اۆسته گلمه‌سن اؤلمه‌ره‌م

اؤلۆره‌م هـراییمـه گــل بابا

گؤرۆب اهل-ی-کین بابا تک منی

یێخێب آتدان اؤلدۆره‌جک منی

گل آماندێ کؤلگییه چک منی

اؤلۆره‌م هـراییمـه گــل بابا

بۇ حسین عزاسی‌دی یاز رضا

اؤزۆ بئیته بئیت وئریر جزا

بۇ سؤزۆ دوباره دئ دۇت عزا

اؤلۆره‌م هـراییمـه گــل بابا

شعر: صراف

حضرت علی اکبر نوحه‌سی امام حسین(ع) دیلیجه

اوْلۇبسان گۆل کیمی پرپر، گؤز آچ گلدیم علی اکبر

باتێبسـان قانیـوه یکسـر، گـؤز آچ گلدیم علـی اکبـر

گۆلۆستان-ی-شهادتده، گؤزل جیسمون اوْلۇب لاله

دۆزۆلمۆش آغ گۆلۆن اۆسته، منظّم قانیله ژاله

دانێش منله‌ن باشۇن اۆسته، بابوْندۇر ائیلییه‌ن ناله

دۆشۆبدۆر قلبیمه اخگر، گؤز آچ گلدیم علی اکبر

باشۇن اۆسته‌ن توانیم یوْخ، دۇرام ای شبه-ی-پئیغمبر

وۇرۇر طعنه گۆلۆر اوْغلۇم، منه بۇ لئشگر-ی-کافر

سپهر-ی-عئشقی غم دۇتمۇش، بۇ گۆن ای تئز سۆزه‌ن اختر

حسینی غم ائدیب مضطر، گؤز آچ گلدیم علی اکبر

باشۇن مُنشق اوْلۇب آی تک، دۇتۇلمۇش قانیله خالون

ائدیب احوالیمی برهم، سنین بۇ پوْزقۇن احوالون

یاتێبسان خاک-وْ-خون ایچره، اۇجالمێش شأن-وْ-اجلالون

گئییبسه‌ن جامه‌ی-ی-احمر، گؤز آچ گلدیم علی اکبر

قتیل-ی-اوّل اۇلدۇن سن، ره-ی-قرآن-وْ-جاناندا

سرای-ی-سرّه سئیر ائتدون، بۇ وحشتلی بیاباندا

هله بیر سۆدامه‌ر واردۇر، خیام-ی-آل-ی-عمراندا

آخێر قۇربان اوْلار اصغر، گؤز آچ گلدیم علی اکبر

گئدیرسن باغ-ی-ریضوانه، بۇ نوعی باغرێقان اوْلما

منیم یالقۇزلۇغۇمدان سن، عزیزیم ناگیران اوْلما

مُحافظ‌دیر حق-ی-منّان، آنوْندان ناگیران اوْلما

سالێب گرچی قارا معجر، گؤز آچ گلدیم علی اکبر

بۇ شأن-وْ-منصبی تاپماق، اوْغۇل روحه صفا ایسته‌ر

بۇ یوْلدا جان به کف دۇرماق، صفا ایسته‌ر وفا ایسته‌ر

قوْجالسا هر آتا من تک، قوْجا وقتی عصا ایسته‌ر

حسین سنده‌ن سوْرا نئیله‌ر، گؤز آچ گلدیم علی اکبر

قالێب گؤز یوْلدا اولاد-ی-علی ای خسته ترلانیم

سنی گؤزلر بی‌بون باجۇن، اوْیان ای غملی جانانیم

خیامه دۇر گئده‌ک منله‌ن، منیم ایسته‌کلی جانانیم

آنوْن لیلا سنی گؤزلر، گؤز آچ گلدیم علی اکبر

قوْشار: تقائی اردبیلی

حضرت علی اکبر(ع)‌ نوحه‌سی آناسێ دیلیجه

ای حسینین دوْغرانان قۇربانێ، اکبر آچ گؤزۆن

سالمـا گـؤزده‌ن بینـوا لیـلانـی، اکبـر آچ گؤزۆن

عؤمرۆم اوْلسا هر قده‌ر من آغلارام صبح-وْ-مساء

لیلینی بیر درده سالدۇن ای شبیه-ی-مصطفیٰ

درد-ی-جسمانی دگیل تاپسێن طبابَتله‌ن شفا

بیر طبیب ایسته‌ر اوْلا روحانی، اکبر آچ گؤزۆن

ای نــژاد-ی-هــاشمیـده نــورس-وْ-رعنــا قــَدیـم

ائیله فکر ائتمه کی گلدۇن، خئیمییه من بیلمه‌دیم

گلمه‌گۆن بیلدیم ولی عذریم وارێدێ گلمه‌دیم

عفو ائله بۇ خانیمان ویرانی، اکبر آچ گؤزۆن

پاییـن-ی-پایـونـده اگلــه‌شـدیم مـن ای نورستـه گـۆل

چون حیا مانعدی باشۇن اۆسته گئچسه‌م خوْش دگیل

لاعلاجم سؤیلـه لیـلا باشینه تؤکسۆن نـه کـۆل

گؤرمه‌ره‌م اوْل صورت-ی-تابانی، اکبر آچ گؤزۆن

آتش-ی-قلبیمه وۇرمۇش داغ-ی-هئجرانون اتک

یاندێ قلبیم بۇ یانار اوْددان منی بیر یانه چک

توْی ائدیبسه‌ن، خلعتیم بس هانێ، اکبر آچ گؤزۆن

حقّی واردۇر لیلی‌نین گؤزده‌ن تؤکه خون-ی-جیگر

من سنی مئیدانه بۇ نوعی یوْلا سالدێم مگر

باشۇن اۆسته آچماسئیدی باشێنێ عمّه‌وْن اگر

زۆلفیمله پاک ائده‌ردیم قانێ اکبر آچ گؤزۆن

بیـر کنیــزه‌م بــاوفـــا اکبـــر قبـــول ائتسـوْن منــی

سن بیلیرسن کی نه قدری ایستئییر قلبیم سنی

قلبیمین بـاشینـه ضـم ائتـدیم بـۇ قانلێ چکمه‌نی

تاکـی شـدّت ائتمــه‌سیـن جریانـی اکبر آچ گؤزۆن

قانلێ گؤزیاشێم سارالمێش روی‌یمی وئرمیش سئله

قلبیمی سێندێرما ائتمه نااۇمود اوْغلۇم بئله

خواهیشیم واردۇر عبانی گۆل یۆزۆنده‌ن ردّ ائله

بیر منه گؤسته‌ر رُخ-ی-زیبانی اکبر آچ گؤزۆن

ای جمال-ی-عالـم آراسـێ اوْلان شمــع-ی-ارم

یاره‌وه قان پرده چکمیش قوْیمئیۇر حدّین بیلـه‌م

بیـر عبــادور رؤیتـا" قێـرمێـز وجـودون گؤرمه‌ره‌م

گیزله‌دیبدیـر دوْغـرانان اعضـانـی اکبر آچ گؤزۆن

برگ تک قلبیم اسیر، هئجرونده اوْلمۇش قان اوْغۇل

گۆل یۆزۆن گؤسته‌ر آنوْندان ائیله‌مه پئنهان اوْغۇل

گلسه شهزاده سفرده‌ن ذبح اوْلار قۇربان اوْغۇل

ائیله قۇربان جانیوه بۇ جانی، اکبر آچ گؤزۆن

ثبت ائده‌ر «انور» سنین درد-وْ-ملالون دفتره

توشه تا اخذ ائیله‌سین دار-ی-فناده‌ن محشره

زایر اوْلسۇن ایسته‌ر بیرده مزار-ی-انوره

اوْردادۇر چون دردینین درمانی، اکبر آچ گؤزۆن

قوْشار: انور اردبیلی

علی اکبر(ع) مرثیه‌سی

علی سواره گئدیبسه‌ن، ولی پیاده گلیبسـه‌ن

اوْیان گؤرۆم ندی دردون، نییه عباده گلیبسه‌ن

عبانی ردّ ائله یۆزده‌ن اوْ شمع-ی-حُسنی آلێشدێر

یامان گۆنۆمدۆ بیلیرسن، بۇ بینوانی دانێشدێر

یاروْندا واردێ اذیّت و یاکی چوْخ یوْرۇلۇبسان

یقین بۇ قدّ-ی-رسایه دگیبدیر اوْخ یوْرۇلۇبسان

آیاق طرفده اوْتۇردۇم تصوّر ائتمه یادام من

بۇ قانلێ چکمه‌لریوی گره‌ک اؤزۆم چێخادام من

سینه‌مین اۆسته قوْیام من بۇ قانه باتمێش آیاغۇن

دانێشدێرام سنی بلکه اؤپه‌م اوْ قانلێ دوْداغۇن

اۇتانێرام علی اکبر! آتام عبانی یۆزۆنده‌ن

بۇ قاره معجریمله‌ن سالام اوْ قانێ گؤزۆنده‌ن

گره‌ک آیاق طرفونده اوْلا بۇ قلب-ی-شیکسته

بی‌بی‌لرون باخێر آخَر نئجه گلیم باشۇن اۆسته

کنیزدور بۇ مکاندان آنوْن نه عُذریله دۇرسۇن

کنیزلر گره‌ک اوْغلۇم آیاق طرفده اوْتۇرسۇن

تعجبم بۇ غمون قلبیمه شراره تؤکۆبدۆر

آتوْن بۇ قدّ-ی-رسانی نییه عبایه بۆکۆدۆر؟

بۇ نقشه‌نی بیلیره‌م من، گلیبدی درده چکیبدیر

یارالێ سینوْون اۆسته عبانی پرده چکیبدیر

منی نظرده دۇتۇبدۇر و یا سکینه‌‌ی-ی-زاری

بۇ فکریله‌ن کی مبادا گؤزۆم گؤره یارالارێ

باخێب عباسینه بیلدیم ولی نه قدری یاروْن وار

مگر سنین بدنونده سلامت عضو هاروْن وار

بۇ نوعیله‌ن کی آخان قان، ائده‌ر بۇ توْپراغێ گۆلنار

بئیله مشخّص اوْلۇر کی منیم ائویمی یێخێبلار

بلا تموج ائدیب گؤر گلیب هایانا چاتێبدێر

یقین سنی گتیره‌نده، آتوْندا قانه باتێدێر

یارالانێبسان ائشیتدیم غم-وْ-ملالیله گلدیم

اؤزۆمده بیلمیره‌م من، بۇرا نه حالیله گلدیم

قانادێ باغلێ اوْلان، قۇش کیمی بۇ یئرده سێخێلدێم

یوْل اۆسته بیر نئچه دفعه بۇرا گلینجه یێخێلدێم

قارا ساچێم کیمی دونیا اوْلۇبدۇ تیره گؤزۆمده

بی‌بی‌لرون منی گتدی یوْخۇدۇ طاقت اؤزۆمده

تعجب ائیلیره‌م ای نژاد-ی-هاشمه فاخر

گلیب بۇرا نئجه چاتدێم نییه من اؤلمه‌دیم آخر

یانێر اۆره‌ک علی دۇر گؤر بۇ دربه‌در نییه آغلار

جاوان اوْغۇللار آنانێ مگر بۇ نحویله یوْخلار

یۇخۇدۇ من گؤرۆره‌م یا کی آشکاریدیر اکبر

عبا ایچینده کی سن‌سن بۇ حالیله‌ن گتدیله‌ر

سنی نه حالیله سالدێم یوْلا مینایه گئده‌نده

عبا ایچنده گلیبسه‌ن ولی خیامه گله‌نده

قێزارمێسان گـۆلـه یاقـوتا اوْخشۇسـان نئجـه گـؤرسن

باخان دییه‌ر توْی ائدیبسه‌ن لیباس-ی-توْی گئیینیبسه‌ن

قۇتارمێیان غم-وْ-دردیم سؤزۆم بۇقلبیده واردێ

جنازه‌وه یئتیشینجه‌ک اینان کی زۆلفۆم آغاردێ

قاباغۇوا منی عفو ائت گله‌نده گلمه‌دیم اکبر

حرمسراده اوْتۇردۇم اۆزۆمۆ بیلمه‌دیم اکبر

فدا اوْ گؤزلره لیلا، اوْیان اوْیان نه یاتێبسان

من-ی-فلک زده‌نی اوْلما خاطرونده‌ن آتێبسان

گؤزۆم عُذاریمه قان‌یاش تؤکه مجاز ائیلئیورسن

سسیم قۇلاقیوه یئتمیر و یاکی ناز ائیلئیورسن

اِراده هر یانا ائتسوْن گلیب دالۇنجا سۆرۆننه‌م

توْیۇن گؤره‌نمه‌دیم امما لیباس-ی-قاره بۆرۆننه‌م

یوْخۇمدۇ چاره بۇ یئرده پناه صبره آپاررام

کئچیبدی نیسگیلون حدّه‌ن،اۆره‌گده قبره آپاررام

یازاندا مُحنتون «انور» گله‌ر تموجه دردی

بیلیر علی باشۇن اۆسته آنوْن نه نوعی مله‌ردی

قوْشار: انور اردبیلی

حضرت ابوالفضل(ع) اۆچۆن بیر گؤزل و خاطیره‌لی نوحه

دۇر ای دعــوالــه‌ر اســــلانـێ

ابـوْالـفـضـلیـم عـلـمـداریــم

آخــان سـۇ تـک قێزێـل قانـــێ

ابـوْالـفـضـلیـم عـلـمـداریــم

دیلیم تۇتمـۇر دییــه‌م قــارداش

دۇر ای آرخام ائلیم قارداش

سێنێب سنسیز بئلیم قارداش

ابـوْالـفـضـلیـم عـلـمـداریــم

کسیب دۆشمه‌ن یوْلۇن آخه‌ر

سالۇب ساق-وْ-سوْلۇن آخه‌ر

آخێب قانـۇن گئـدیب جانــۇن

ابـوْالـفـضـلیـم عـلـمـداریــم

علمداریـــم زبـــون اوْلـــدۇ[ی]

قتیل-ی-قوْم-ی-دون اوْلدۇ[ی]

علم تـک سرنگــون اوْلــدۇ[ی]

ابـوْالـفـضـلیـم عـلـمـداریــم

اوْغۇل یوْخ دردیمی بـۆلسـۆن

منــه یـار-وْ-مـوْعیـن اوْلسۇن

اوْغۇل‌سێز قارداشۇن اؤلسۆن

ابـوْالـفـضـلیـم عـلـمـداریــم

تۆکـه‌ندی طاقه‌تیم سن‌سیز

بۆکۆلدۆ قامه‌تیم سن‌سیز

قان آغلار عیتره‌تیم سن‌سیز

ابـوْالـفـضـلیـم عـلـمـداریــم

اؤزین مــقـصودیــوه یئتــدیـن

بئله احبابـی تـــرک ائتـدیــن

منی یالقۇز قـوْیـۇب گئتـدیـن

ابـوْالـفـضـلیـم عـلـمـداریــم

ایـا مــاه-ی-بنــی هاشیــــم

منیم ایسته‌کلی قارداشێم

دؤنــۆب آلقــانـا گــؤزیـاشێـم

ابـوْالـفـضـلیـم عـلـمـداریــم

دئسه‌م گؤرمه‌ز گؤزۆم قارداش

یقین دۆزدیر سؤزۆم قارداش

سنـه قـۇربــان اؤزۆم قــارداش

ابـوْالـفـضـلیـم عـلـمـداریــم

اؤزۆن گئتدین خـلاص اوْلـدۇن

دوْلــۇ پئیـمانه تک دوْلــدۇن

گۆلۆستانێـم نه تئز سوْلـدۇن

ابـوْالـفـضـلیـم عـلـمـداریــم

سنی کیم غرق ائدیب قـانه

سالێب بۇ قانلــێ مئیدانــه

یــانـار بــــۇ حــالــه بیــگـانـه

ابـوْالـفـضـلیـم عـلـمـداریــم

بــۇ غـۆربـه‌تـده وحیـد اوْلدۇم

کؤمه‌کـده‌ن نا اۇمـۇد اوْلدۇم

سن اؤلدۆن من شهید اوْلدۇم

ابـوْالـفـضـلیـم عـلـمـداریــم

قـالـێــب صــراف-ی-بیـچــاره

مـحیـــط-ی-غـمــــده آواره

اؤزۆن قیــل دردینـــه چــــاره

ابـوْالـفـضـلیـم عـلـمـداریــم

قوْشار: سیّد رضا صرّاف تبریزی

عاشورا گئجه‌سی نوحه‌سی

گــۆل-ی-گۆلــزار-ی-ریسالـه‌ت بـۇ گئجـــه
شئمـریده‌ن ایسته‌دی مؤهله‌ت بۇ گئجــه

بیــر دوْیــۇنجــا بـاخــا اکبــر یــۆزۆنـــه
ائیلییــــه آیــــه تـــلاوت بـــۇ گئــجـــه

زینبیــن قلبینــی آرام ائیلـه‌ییب
اوْلا مشغول-ی-عبادت بۇ گئجه

یاتمئیوب آل-ی-علی صبحـه کیمـی
شیعه یاتسێن نئجه راحت بۇ گئجه

بیلمیره‌م نئیله‌دی بس تازه گلیـن
اوْنا یۆز وئردی نه حالت بۇ گئجـه

امّ لیلایـه بـۇیۇردۇ شــه-ی-دیـن
سنده وئر اوْغلۇوا زینب بۇ گئجه

دۇتــدۇ دونیــا یــۆزۆنــۆ موج-ی-بــلا
داشدێ دریای-ی-مصیبت بۇ گئجه

باغـــلانــۇب سـۇ یوْلــۇ تئشنــه قالۇب
عیتره‌ت-ی-شاه-ی-ولایت بۇ گئجـه

شُهداله‌ر آدێنا کئلک قضا
یازدێ فرمـان-ی-شهاده‌ت بۇ گئجه

قوْشار: سیّد رضا صرّاف تبریزی

تاسوعا نوحه‌سی، امام(ع)‌ین دیلیجه

هله گۆلشَنین گـۆلــۆ سـوْلمئـیــوب

آنــام آغـــلامـــا، بــاجێـــم آغـــلامــا

هله ساغـدێ قارداشـۇن اؤلمئیـوب

آنــام آغـــلامـــا، بــاجێـــم آغـــلامــا

آنامێن عزیزه قێزێ باجێم

هله اوْلما مایل-ی-درد-وْ-غم

قوْشۇنۇم دۇرار هامێ بیر به بیر

هله یاتمئیوبدی اسیر عَلَم

هله صاحب-ی-عَلَم اؤلمئیوب

هله ائتمئیوبله قوْلۇن قلم

هله مشکی قانیله دوْلمئیوب

آنام آغلاما، باجێم آغلاما

هله قۇملار اۆستۆنه دۆشمئیوب

باجێ اکبرین قد-ی-نورسی

گۆن ائوینده ظۆلمیله قالمئیوب

هله پاره-پاره جنازه‌سی

هله خئیمه‌لرده‌ن اۇجالمئیوب

گؤیه لئیلی‌نین بالا وای سسی

هله مشکی قانیله دوْلمئیوب

آنام آغلاما، باجێم آغلاما

هله پوْزمئیوبله تیفاغیمی

هله رونقی وار اساسیمین

هله قوْیما ایندی عم اوْغلۇ وای

دییه نو عروسینی قاسمین

هله یاسه باتما چوْخ آغلاما

هله ابتداسیدی یاسیمین

هله مشکی قانیله دوْلمئیوب

آنام آغلاما، باجێم آغلاما

هله اؤلمئیوب ایکی نورسین

جیگرین باشێ هله یانمئیوب

هله زۆلف-ی-کاکُل اکبریم

باجێ آلقانینه بوْیانمئیوب

هله آغلاماز علی اصغریم

هله ظۆلم اوْخیله‌ن اوْیانمئیوب

هله مشکی قانیله دوْلمئیوب

آنام آغلاما، باجێم آغلاما

هله آغلاما قالێر آغلاماق

لیقیوین زمانه ده چوْخ یئری

باجێ زینب آغلاما ساکت اوْل

دئمه ساکت اوْلماغا یوْخ یئری

هله یوْخ باشێمدا قێلێج یئری

بدنیمده یوْخ هله اوْخ یئری

هله مشکی قانیله دوْلمئیوب

آنام آغلاما، باجێم آغلاما

بۇ دیاریده ای آنام باجێ

هله ظۆلم لجّه‌سی داشمئیوب

هله لئشگر-ی-ستم-وْ-جفا

سیزه جور-وْ-ظۆلم الین آشمئیوب

هله خئیمه‌گاهیم آلیشمئیوب

هله عترتیم چؤله قاشمئیوب

هله مشکی قانیله دوْلمئیوب

آنام آغلاما، باجێم آغلاما

هله شیشه‌-ی-دل-ی-صافیوی

باجێ غم کدورتی باسمئیوب

هله دین اساسی پوْزۇلمئیوب

هله صر-صر-ی-ستم اسمئیوب

هله ظۆلم عرشه دایانمئیوب

هله شئمر باشیمی کسمئیوب

هله مشکی قانیله دوْلمئیوب

آنام آغلاما، باجێم آغلاما

هله قلبین ای باجێ یانمئیوب

یانار اوْدلار اۆزره کباب تک

بۇ قده‌ر سێزێلداما آغلاما

هله چکمه ناله رباب تک

باجێ قانیمی باجێلار یۆزه

هله یاخمئیوبدی خضاب تک

هله مشکی قانیله دوْلمئیوب

آنام آغلاما، باجێم آغلاما

هله هست عئشقیله هست سن

هامێ‌دان علاقه‌نی کس رضا

هله کی حسین پرست‌سن

بۇ سؤزیله وئر اوْنا سس رضا

هله سوز-ی-دردیله مست سن

نه‌دی بۇ هوا-وْ-هوس رضا

هله مشکی قانیله دوْلمئیوب

آنام آغلاما، باجێم آغلاما

قوْشار: سید رضا صراف تبریزی

امام(ع)‌ین اتمام-ی-حُجّتی

قـوْنـاقـۇزام عـزالییـام اوْخ آتمئیـون یـارالییـام

بۇ قانلێ دستمـازیله قوْیـۇن قێلێم نمازیمـی

کسین سۇسۇز بوْغازێمێ

منـی بــۇ دشـت-ی-مُحنتـه اوّلـده دعـوت ائیلـه‌دوز

حدود-ی-حقّیده‌ن چێخێب خلاف-ی-بیعت ائیلـه‌دور

قوْناغۇزا سۇ وئـرمـه‌دوز بـؤیـۆک جسـارت ائیلــه‌دوز

غم اهلی‌یم نوالی‌یام، قوْیۇن قێلێم نمازیمی

کسین سۇسۇز بوْغازێمێ

وارێمدێ کردگاریله بۇ انقلابه بیعتیم

گره‌ک باتام قێزێل قانا، دۆشه کمنده عترتیم

شیریندی شهدیده‌ن منه، بۇ دشتیده شهادتیم

من عهدیمه وفالی‌یام، قوْیۇن قێلێم نمازیمی

کسین سۇسۇز بوْغازێمێ

مین اوْخ دگه وجودیمه، ثواب-ی-عئشقی ساتمارام

وصــالیمـیـن قـرارینـی نیـگاریـله‌ن یـۇباتـمـارام

باشێم گئده الیم گئده، یزیده ال اۇزاتمـارام

بۇ امره ادّعالی‌یام، قوْیۇن قێلێم نمازیمی

کسین سۇسۇز بوْغازێمێ

شهـادت اهـل-ی-حـق اۆچۆن، گؤزل حیات-ی-عئشقـدیر

حسینـه سیـز وۇران یـارا، محـسّنـات-ی-عئشقیـدیر

حقیقتـی گـؤره‌ن بیلــه‌ر مقــدّرات-ی-عـئشـقـیــدیر

کی من باشێ بلالی‌یام، قوْیۇن قێلێم نمازیمی

کسین سۇسۇز بوْغازێمێ

دیانـت اهلـی‌سیـز اگـر یـزیـده دیـنی ساتمئیون

سرشک-ی-آل-ی-حیدری، ستمله قانه قاتمئیون

آدامسێزام کؤمک‌سیزه‌م اوْخ آتمئیون، داش آتمئیون

یارالـێ‌یام،یارالێ‌یام، قوْیۇن قێلێم نمازیمی

کسین سۇسۇز بوْغازێمێ

یوْخۇمدۇ راه-ی-حقّیـده‌ن، سَـوا یـوْلا گـراییشـیـم

بـۇ قانلـێ قتلگاهێــدێر، محــلّ-ی-آزماییشیــم

گره‌ک اوْلا نیگاریلـه، بۇ عـرصـه ده نیاییشیـم

من عبدذوالجلالی‌یام، قوْیۇن قێلێم نمازیمی

کسین سۇسۇز بوْغازێمێ

حسینـه سـۆد وئـره‌ن آنـا شـرفلـی‌دیـر عفیفه‌دیر

نمــازی قائـم ائیلـه‌مـک بۇ گۆن منه وظیفــه‌دیـر

آخـان قـانێــم ولایـتــه، مُـرکّـب-ی-صحیفــه‌دیــر

گؤرۆن کیمه‌م هارالێ‌یام، قوْیۇن قێلێم نمازیمی

کسین سۇسۇز بوْغازێمێ

ترحّم ائیله‌یین منه انیس-وْ-یاوه‌ریم گئدیب

اؤلۆب گؤزل جاوانلارێم، وزیر-ی-لئشگریم گئدیب

شهید اوْلۇب بۇ جبهـه‌ده الیمـده‌ن اکبـریم گئدیب

غریب-وْ-دستی خالێ‌یام، قوْیۇن قێلێم نمازیمی

کسین سۇسۇز بوْغازێمێ

دۇتۇب وجود-ی-پاکیمی شراره‌ی-ی-ستم یانێر

بلای-ی-عئشقه دمبدم دیلیم وۇرۇر رقم یانێر

خییَه‌مده گؤزلئیور منی، بنات-ی-محترم یانێر

قبیله‌ده‌ن آرالێ‌یام، قوْیۇن قێلێم نمازیمی

کسین سۇسۇز بوْغازێمێ

وۇراندا «سیفی» هر زمان قلم بۇ بیر مُصیبته

دییه‌ر فدا اوْلۇم حسین اوْ ساعته اوْ حالته

بۇیۇردۇن اشتیاقیله اوْ بی‌حیا جماعته

اوْخ آتمئیون یارالێ‌یام، قوْیۇن قێلێم نمازیمی

کسین سۇسۇز بوْغازێمێ

قوْشار: سیّد تقی سیفی اردبیلی

شام غریبان سؤال-جاوابی

حضرت سیّدالشُهدا(ع)نین موباره‌ک نعشی اۆسته قێزێ سکینه خاتون سوْرۇر

سکینه خاتون:

بـابـا گلمیشـه‌م سنه آغلێیـام

بۇ میناده یاسیوی ساخلێیــام

اؤز الیـملــه یــاره‌وی بـاغلێیـام

منیله‌ن دانێش گؤزۆ یاشلێیـام

جیگریم یانێب بابا یانمێشام

باشێما قارا بابا سالمێشام

سنی بۇ مکانیده تاپمێشام

منیله‌ن دانێش گؤزۆ یاشلێام

سینوْن اۆسته آل بۇ سکینه‌نی

ائلـه سـرفــراز بــۇ یتیـمـــه‌نــی

نییـه آتمێســان بــۇ عـزیـزه‌نــی

منیلـه‌ن دانێـش گـؤزۆ یاشلێـام

امام(ع):

قێــزێــم حــالیــوه اؤزۆم آغـلارام

بـۇ یـارالــێ قـلبیمــی داغــلارام

سنی گل بۇ سینه‌ده ساخلارام

آیـاغــۇن یــاراسێنــێ بـاغــلارام

قێـزێـم آغـلامـا، بــالام آغــلامــا

سکینه خاتون:

هامێ عمّه‌لر سوْیۇلۇب بابا

باجێلار بۇ گۆن یوْرۇلۇب بابا

منه قمچی‌لر وۇرۇلۇب بابا

منیله‌ن دانێش گؤزۆ یاشلێام

بابا خئیمه‌گاهیمیز اوْدلانێب

اوْد ایچینده نازلێ بالوْن قالێب

اته‌گیم نه نوعیله گؤر یانێب

منیله‌ن دانێش گؤزۆ یاشلێام

بیزه اهل-ی-کینه آمان وئریب

بۇ یانان چادیـردا مکان وئـریـب

نئچه خواهریم بابا جان وئریب

منیله‌ن دانێش گؤزۆ یاشلێام

امام(ع):

قێــزێــم حــالیــوه اؤزۆم آغـلارام

بـۇ یـارالــێ قـلبیمــی داغــلارام

سنی گل بۇ سینه‌ده ساخلارام

آیـاغــۇن یــاراسێنــێ بـاغــلارام

قێـزێـم آغـلامـا، بــالام آغــلامــا

سکینه خاتون:

منی چوْخ وۇرۇب بابا شئمـر-ی-دون

نئجــه اینجیـدیـب بابا شئمـر-ی-دون

سنی ذبح ائدیـب بابا شئمر-ی-دون

منیلــه‌ن دانێـــش گـــؤزۆ یـاشـلێــام

منــه واردێ لۆطـف-وْ-محبّتـون

بابا کسمه‌سن داخـی اُلفَتـون

بیلیــره‌م وارۇن منــه رعـفتــون

منیله‌ن دانێش گـؤزۆ یاشلێـام

هانێ سۆدامه‌ر علی قارداشێم

منـه غـم گـۆنـۆ بابـا یـوْلداشێـم

تؤکه‌ره‌م عُذاریمـه گـؤزیـاشێــم

منیلـه‌ن دانێـش گـؤزۆ یاشلێـام

امام(ع):

قێــزێــم حالیــوه اؤزۆم آغـلارام

بـۇ یـارالێ قـلبیمــی داغــلارام

سنی گل بۇ سینه‌ده ساخلارام

آیـاغــۇن یــاراسێنــێ بـاغــلارام

قێـزێـم آغـلامـا، بــالام آغــلامــا

سکینه خاتون:

بـابـا گــوشــواره‌مــی آلــدێــلار

منــی آت قـاباغێنــا سالــدێـلار

همی سوْیدۇلار همـی وۇردۇلار

منیلـه‌ن دانێـش گـؤزۆ یاشلێـام

سنه چوْخ سکینـه وفالــی‌دیــر

باباجــان نقـدری بـــلا‌لـــی‌دیــر

باخـارام بـۇ نعشـه یـارالـێ‌دیــر

منیلـه‌ن دانێـش گـؤزۆ یاشلێـام

گزه‌ره‌م بۇ دشت-ی-بلانـی مـن

ســالارام بـۇ بـاشـا قارانـی مـن

قــۇرارام بـۇ یئــرده عـزانـی مــن

منیلـه‌ن دانێـش گـؤزۆ یاشلێــام

امام(ع):

قێــزێــم حــالیــوه اؤزۆم آغـلارام

بـۇ یـارالــێ قـلبیمــی داغــلارام

سنی گل بۇ سینه‌ده ساخلارام

آیـاغــۇن یــاراسێنــێ بـاغــلارام

قێـزێـم آغـلامـا، بــالام آغــلامــا

قوْشار: یوسف حیرانی اردبیلی

جناب قاسیم شامدا موباره‌ک باشێنین احوالاتێ

اهل-ی-اخبار مقاتیلده یازێب بۇ خبری

مرغ-ی-روحین ائشیده‌ن وقته سینیر بال-وْ-پری

یاندێران سؤزدۆ سالێر رقّته قلب-ی-بشری

شام ویرانه اوْلان گۆنده ورود اُسراء

یۆز وئریب قاسیم-ی-شهزاده‌یه بیر آیرێ بلا

خط-ی-سیر-ی-اُسراء دوْلمۇشۇدۇ میللت‌‌یله

هرزه عورت‌لریله، مردُم-ی-کم همّتیله

جشنه مشغولیدی شهر اهلی نه کیفیت‌یله

گه باخۇردێلا یوْلۇن ساغینه، گاهی سوْلۇنا

گؤزلری منتظریدی اُسرانین یوْلۇنا

ناگهان شهره ورود ائیله‌دی بیر تیپ سوار

اُمراء اوّل-ی-صفده گؤرۆنۆب مست-وْ-خومار

ائتدی تشویق اوْ سرکرده‌لری فرقه‌ی-ی-نار

مرحبا صوتی بلند اوْلدۇ گؤگه هر یاندان

مرکب اۆسته سئوینیب فخر ائله‌دی شئمر-وْ-سنان

ازرق‌ین زوجه‌سی بیر غرفه ده ائتمیشدی مقام

اُمرانین صفینه باخدێ اوْ ناپاک حرام

گؤرمه‌دی همسر-ی-خونخوارینی تئز ائتدی قیام

اوْلدۇ آگاه اوْ ملعونه طریقت خطره

غرفه‌نین پلّه‌لرین سرعتیله ائندی یئره

اؤزۆنۆ شئمر-ی-دغایه یئتیریب آلدێ خبر

هانێ ازرق؟ هانی اوْغلانلارێم ائی منبع-ی-شر

گؤرمۆره‌م هئچ بیرینی ائیلیره‌م اطرافه نظر

اؤزلرین شامه اوْلار، فکر ائلئییردیم یئتیره‌ر

سن کیمی هر بیریسی نئیزه‌ده بیر باش گتیره‌ر

دئدی غفلتده‌ سن عورت خبرون یوْخدۇ مگه‌ر

دؤرد جاوان اوْغلۇوۇلان ارزقی ائی خاک سییه‌ر(سیر)

بیر اوْن اۆچ سیننیده اوْغلان ولی مردانه سییه‌ر

رمه‌ی-ی-روبه‌هه حمله ائله بیل شیر ائله‌دی

بیربه‌بیر ییخدی یئره طُعمه‌-ی-شمشیر ائله‌دی

دئدی عورت اؤزۆ بس نوْلدۇ اوْنۇن سؤیله منه

نئیله‌دوز سیز منیم اوْغلانلارێمی اؤلدۆره‌نی

دئدی آهۇ کیمی یێخدێق اوْنۇ دشت-وْ-دمنه

نیگه‌ران اوْلما اوْقدری، اوْنا دگمیشدی یارا

عموسی ائیلییه‌بیلمیردی خییامه آپارا

دئدی گؤسته‌ر یارالێ باشێنێ ائی هرزه روان

قاسیمین باشێن اوْنا شئمر-ی-لعین وئردی نیشان

اؤلدۆرۆبدۆر دئدی اوْغلانلارۇوۇ، باخ بۇ جاوان

یاره‌لی باشه اوْ ملعونه نظر ائتدی بیر آز

اینتیقام آلماسام الان دئدی قلبیم سوْیماز

قایێدێب منزیلینه قێزلارێنا قێلدێ خیطاب

بی‌خبرسیز بیزی بۇ جنگ ائله‌ییب خانه خراب

اینتیقامه اوْلۇن آماده دگیل موقع-ی-خواب

یۆزه گؤرمۆرسۆز آنوْز اشکینی حسره‌تله الور(الیر)

آتا قارداشلارۇزۇ اؤلدۆره‌نین باشێ گلور(گلیر)

دوْلدۇرۇن دامه‌نوزو سنگ-ی-عداوه‌تله هامۇز

پیشوازینه گئدین قصد اهانتله هامۇز

نئیزه‌نی دوْره‌لئیین فیکر-ی-خییانتله هامۇز

سنگ باران ائله‌یین باشێنێ مقصوده چاتێن

هر داشێکێ آتۇسۇز سعی ائله‌یین محکم آتۇن

یاندێرێن ظلمون اوْدیلا اُسرانین جیگه‌رین

سێندێرێن غصّه‌لی بولبول‌لرینین بال-وْ-پرین

غرق-ی-اندوه ائله‌یین خانه بئدوش عمّه‌لرین

یاره‌له‌نمیش باشێنێن نئیزه‌ده آرتسێن یاراسێ

مله‌سین ناقه-ی-نوق اۆستۆنده پریشان آناسێ

یئتیریم بۇ سؤزۆ یاربّ نئجه پرده ایله باشا

بیلمیره‌م ائتدیله حمله نئچه یاندان اوْ باشا

گؤزۆنۆ یۇمدۇ «سریه» باخا بیلمیری داشا

کیم دؤزه‌ر ایسته‌دیگین گؤز قاباغێندا وۇرالار

بالا باشێن آنانێن اؤز قاباغێندا وۇرالار

اُسرا بیربیره دگدی، ائله سخت اوْلدۇ محن

سسله‌نیب زینب-ی-کبرا باجۇن اؤلسۆن حسن

نه اوْلار، قاسیمیوی گؤرمه‌گه شامه گله‌سن

یوْخدۇ ایمداده گله‌ن فیکریمیزه سن قالاسان

اوْغلۇوۇ بۇ داش آتانلارێن الینده‌ن آلاسان

داش آتان شخص‌لرین درک ائله‌ییبدیر عمه‌لین

بوْینۇنۇ چیگنینه حسره‌تله قوْیۇب تازه گلین

قاره بختیم دئدی من بیربیرینه وۇردۇ الین

دوشمه‌نین ایندی فله‌ک گؤر نئجه قوّتلی قوْلۇن

هر طره‌فده‌ن یۆزۆمه باغلادێلار، چاره یوْلۇن

رئشته‌ی-ی-عئشقی، عم اوْغلۇ! ائله فیکر ائتمه قێرام

باشۇوۇ داشلێیالار ساکیت-وْ-آرام اوْتۇرام

توْپراغا دَیمیر الیم، باشیمه توْپراق سوْوۇرام

یانێرام اوْدلانێرام، باشۇوا ائتدیگجه نظر

پر شیکه‌سته قۇشا تشبیهه‌م الیمده‌ن نه گله‌ر؟

دؤزمیشه‌م شامه کیمی هر محنه دینمه‌میشه‌م

زجر چوْخ قمچی وۇرۇب یوْلدا منه دینمه‌میشه‌م

غرفه‌لرده‌ن باشێما کۆل تؤکه‌نه دینمه‌میشه‌م

چوْخدۇ دردیم نه روا آیرێ سیته‌م باشلێیالار

من باخێرام نئزه‌نین اۆستۆنده سنی داشلێیالار

یوسئفیم غملی زولیخایه نیشان وئر اؤزۆوی

گؤزۆمه تیره‌دی دونیا نه یۇمۇبسان گؤزۆوی

شامێن اهلی ائشیدیب اوْلما سنین توْی سؤزۆوی

اوْدۇر ایستیلله تسلّی اوْلا غم یوْلداشۇوا

داش آتێرلار سنه یا نُقل سپیرلر باشۇوا

کۆل ائدیب حیجله‌میزی آته‌شیله اهل-ی-قیتال

نه دانێشدێم سنیله، اوْلدۇ نه گوفتاره مجال

نه گلین‌لر کیمی سالدێم باشێما قێرمێزێ شال

توْی گۆنۆ تئل‌لریمی شانه‌ی-ی-محنت دارادێ

دئمیره‌م چوْخ سؤزۆ الآندا قۇلاغێم یارادێ

قوْشار: انور اردبیلی

حضرت قاسم

گلین اشکیله یازاق، یۆزده رموز-ی-مئحنی

باشلێیاق قاسیمێن آدیله بۇ گۆن سر سخنی

مجلیسه دعوه‌ت ائده‌ک شخصاً ایمام-ی-حسنی

ساخلاسێن مد-ی-نظرده هر اۆره‌ک داغلێیانێ

واردی گؤرسۆن نقه‌ده‌ر؛ قاسیمینین آغلێیانێ

گرم ائدیب قاسیمین عئشقی بیزی باشدان آیاقا

الیمیز یئتمیر افسوس اوْ حنالی اوْتاقا

حجله‌گاهینده ایراده ائلییه‌ک آغلاماقا

بۇ یئری خئیمه‌ی-ی-شاه-ی-شُهدا فرض ائده‌ریک

قاره کؤینه‌کله موباره‌کدی توْیۇن عرض ائده‌ریک

توْی لیباسون، کفه‌نه توْی گۆنۆ تبدیل ائتدون

مرگی پیشواز ائله‌ییب، جنگه زرهسیز گئتدون

ائی وفا مجلیسینین شمع-ی-فروزان شییه‌می

یوسفه نیسگیل اوْلان طرّه‌سینین پیچ-وْ-خمی

اکبرین راه-ی-شهاده‌تده اوْلان همقده‌می

نامزد عئشقینی بئلمه‌رره یادیندان چێخادان

مجلیس-ی-وصله‌تینی آتلار آیاقێندا تاپان

صبریده قوْیدۇ، زولیخانی عروسون حئیران

نی‌ده سن گزدون، اوْ صحرانی گزیب سرگه‌ردان

نیسگیلیزله دولۇدۇ سینه‌ی-ی-صندوق جاهان

پشت-ی-پا وصله وۇرۇب، صبریله یۇمدۇز گؤزۆزۆ

دیل‌له‌ره سالدێ زمانه نئجه گؤر توْی سؤزۆزۆ

قوْشار: انور اردبیلی

حضرت رقیّه قتلگاهدا آتاسێنان ویداع ائده‌ره‌ک سؤیلۆر

سنیـن یانـۇنـدا گـؤر بابا، وۇرانـدا کـوفییان منـی

گئدینجه شامه اؤلدۆره‌ر، یقین بۇ ساریبان منـی

هانی ازه‌لکی عیزّه‌تیم، نه گلدی آل-ی-هاشیمه؟

قالێب هایاندا اکبریم؟ وۇرۇللا قمچی باشیمه

عمیم هانی؟ گلیب باخا گؤزیمده قانلێ یاشیمه

گؤره سالێب نه حالته؟ بۇ گرده‌ن-ی-زمان منی

مگه‌ر یتیمه قێزلارێ سالار بۇ حاله روزگار

نه وار باشێمدا معجریم، نه یۆزده بُرقَع-وْ-خمار

جفای-ی-تازییانه دن وجودیم اوْلدۇ زخمدار

ندیر گۆناهیم ائی بابا؟ وۇرۇر بۇ شامییان منی

ائدیبله غم خزینه‌سی، بۇ قلب-ی-پاره پاره‌می

یاناندا خئیمه‌گاهیمیز، آلێبلا گوشواره‌می

یوْخۇمدۇ بیر کسیم بابا، کسیبله راه-ی-چاره‌می

سالێبلا آت قاباغێنا، ائدیبله باغرێ قان منی

یتیمه بیر قێزام بابا، اسیر-وْ-خواره‌م آغلارام

گئدیبدی صبر-وْ-طاقه‌تیم، علیل-وْ-زاره‌م آغلارام

گله‌ن وۇرار، گئده‌ن وۇرار، یوْخۇمدۇ چاره‌م آغلارام

غریق-ی-سئیل-ی-اشک ائده‌ر، بۇ چشم-ی-خونفیشان منی

وۇرۇبدێ سیلی شئمر-ی-دون، بنؤوشه تک یانێب اۆزۆم

اوْدۇر کی متّصل تؤکۆر، عذاره قانلێ گؤزیاشێم

قوْلۇمۇ باغلایێب عدو، دؤنۆبدۆ شامه گۆندۆزۆم

کسیر قوْلۇمۇ اینجیدیر، بۇ بند-ی-ریسمان منی

نقدری صبر ائدیم مگه‌ر، دیل آچمایێم شیکایه‌ته

هله جفاسی دۆشمه‌نین، یئتیشمه‌ییب نهایه‌ته

عیالیوی اسیر ائدیب، چکیلله هر ویلایه‌ته

خرابه‌لرده اؤلدۆرۆر، بۇ مئحنه‌ت-ی-گیران منی

علاج یوْخدۇ دینمیره‌م، وۇراندا شئمر عیتابیله

باشۇن دالێنجا شامه دک، گره‌ک گله‌م شیتابیله

وئره‌م خرابه‌لرده جان، بۇ سوز-وْ-ائلتیهابیله

غم-ی-فیراقون ائیله‌ییب، علیل-وْ-ناتوان منی

دوْیۇنجا آغلێیانمادێم، اۆره‌کده قالدێ حسره‌تیم

دییار-ی-شامه عازیمه‌م، چتیندی بیر رجعتیم

بۇیۇر دارێخماسێن بی‌بیم، یئتیشسه هر اذیتیم

قاباغا وئرسین اللــه‌رین، وۇراندا ساریبان منی

بۇ اهل-ی-کینه آنلایێب کی من چوْخ ایستیره‌م سنی

اوْدۇر سبب کی چکدیله‌ر، بۇ قتلگاهیده‌ن منی

موزاحیم اوْلمایێم داخێ، مرخّص ائت رقیّه‌نی

اگرچی سن‌سیز اؤلدۆرۆر، بۇ ناله-وْ-فغان منی

گله‌نده؛ قارداشێم منی سوار ائدیردی محمیله

محبّت‌ ایله ائندیریب یئته‌نده هر منازیله

اوْدۇر کی آختارێر گؤزۆم، کی بلکه اکبریم گله

سوار ائده کجاوییه اوْ یار-ی-مئریبان منی

کریمی‌نین رقیّه‌ده‌ن حیمایه‌ت آرزوسی وار

همین بۇ شئعره جاییزه شفاعه‌ت آرزوسی وار

هوای-ی-شامی چوْخ سئویر، زییاره‌ت آرزوسی وار

دئییر یئتیر اوْ قبره ائی، خودای-ی-لامکان منی

قوْشار: کریمی

حسین حسین

فلک دئییر حسین-حسین، ملک دئییر حسین-حسین

چکیبله قاره هر یئره، اۆره‌ک دئییر حسین-حسین

نه سیرّی واردێ بیلمیره‌م، دۇتۇبدۇ عرش-وْ-فرشی غم

قارادێ غم سرالره، وۇرۇبدۇلار قده‌م قده‌م

گلیر عزایه صاحیب-ی-فده‌ک دئییر حسین-حسین

فلک دئییر حسین-حسین، ملک دئییر حسین-حسین

قارا گئییبله شیعه‌لر، قارا حسین قاراسێدێر

اۆره‌کلری دۇتۇر نوا، نوا حسین نواسیدیر

قۇرۇلمۇش عرش-وْ-فرشیده، عزا حسین عزاسیدیر

خزنده-وْ-پرنده-وْ-سمک دئییر حسین-حسین

گؤرنده غم سرالری، داماردا قان دئییر حسین

طبیب-ی-بی‌مثاله باخ، جهانیان دئییر حسین

یامان بلایه دۆشۆبگین، مسیحیان دئییر حسین

یهودیلرده ایسته‌ییر کؤمک، دئییر حسین

داغێن داشێن یئرین گؤیۆن، نه نوعی گؤر صداسی وار

نظر سالاندا هر یئره، اوْ یئرده غم هواسی وار

باخان تعجّب ائیله‌ییر، عجیبه ماجراسی وار

اۇشاقدا شاه-ی-بی‌کفن دئجه‌ک دئییر حسین-حسین

نه سیرّی واردێ بیلمیره‌م، تمام-ی-عالم آغلایێر

حسینه بزم-ی-غم قۇرۇب، رسول-ی-خاتم آغلایێر

قارا لیباسیله‌ن گلیب، عزایه آدم آغلایێر

آناسێ باغلایێب قارا، لچه‌ک دئییر حسین-حسین

هایاندا یاسێ باشلانێر، قارا چکیرلر ابتیداء

باخاندا بۇ قارالارا، اۆره‌کلری دۇتۇر نوا

گزیر بۇ غم سرالری، اوْلان بلایه موبتلاء

کیمین دییه‌نده مقده‌مین، اؤپه‌ک دئییر حسین-حسین

فلک دئییر حسین-حسین، ملک دئییر حسین-حسین

قوْشار: سره‌سکندلی نوازی

حسین‌ین عزاسی گلدی

گلین عزیزان اۆره‌ک اوْلۇب قان

گینه حسین‌ین عزاسی گلدی

حسینه قۇربان اؤله‌نده عطشان

باشێنێن اۆسته، آناسێ گلدی

گل ائی حسین‌چی، بیر ایل دئییردون

محرّم اوْلسۇن، محرّم اوْلسون

چکیلدی عرشه، حسین قاراسی

عزایه قلبون، مصمّم اوْلسون

دئنه‌ن حسین وای،‌غریب آقام وای

سنه عزاده، غم همدم اوْلسون

اۆره‌کده دردین، کیم ائتدی ایظهار

اوْنا حسین‌ین، دواسی گلدی

بۇ آیدا یاران، بلا چؤلینده

علی-وْ-اکبر، جهاده گئتدی

وئریلدی زینت، ذبیح-ی-زهراء

قتیل اوْلۇنسۇن، میناده گئتدی

تاپێب شهاده‌ت، اوْ گۆن میناده

خییامه جیسمی، عباده گئتدی

حسین بۇیۇردۇ، دئیین آنایا

خییامه زیبا، بالاسێ گلدی

بۇ آیدا گؤردۆ، سۇسۇزلار آغلار

گؤتۆردۆ مشگ-وْ-لوا ابالفضل

گئدیب فراته، وۇرۇبدۇ پرچم

سۇسۇز چێخێبدێر، آقا ابالفضل

دۇرۇبدۇ یوْلدا، گلنده اعداء

گؤرۆبدۆ قولدان، یارا ابالفضل

دئدی آقام گل، یێخێلدێ نوکر

هرایه فۇرا"، آقاسی گلدی

بۇ آیدا شیعه، سۇسۇزلۇغۇندان

علی-وْ-اصغر، دوْداغێ یاندێ

گئدیب سۇ آلسێن، اوْ گۆن عدوده‌ن

وۇرۇلدۇ پئیکان، قانا بوْیاندێ

سۆزۆلدۆ گؤزله‌ر؛ میناده غملی

بالا قۇجاقدا، آنا دوْلاندێ

بتول-ی-اطهر، آچێبدێ معجر

حسینه جان-جان، صداسی گلدی

بۇ آیدا قاسیم، گئدیب جیداله

آناسێ آغلار، دالێجا قالدێ

تؤکۆلدۆ اعدا، آرایا آلدێ

چمنده گۆل تک، سوْلۇب سارالدێ

یئتیشدی داده، اؤله‌ن چاغێندا

باشێن دیز اۆسته، عموسی آلدێ

آناسێ اوْل دم، ائده‌نده دیدار

الی اۆره‌کده، نواسی گلدی

قوْشار: معزّی اردبیلی

حسینه آغلار

ای شیعه‌لر بۇ آیدا، گؤیله‌ر حسینه آغلار

عرش-ی-خدا تزلزل، ائیله‌ر حسینه آغلار

گر آغلاماق کی مومکون، ذات-ی-خدایه اوْلماز

ور مومکون اوْلسا ناله، ائیله‌ر حسینه آغلار

مسجدلره چکیب‌لر، بۇ آیدا قاره یکسر

بۇ آیدا مسجد-وْ-هم، منبر حسینه آغلار

یئر اۆسته داغلارا باخ، یکسر باشێ دۇماندێ

گویا سالێبدێ قاره، داغلار حسینه آغلار

هر یئرده هر چمنده، بولبول گلیر نوایه

کرب-وْ-بلانی یادی، ائیله‌ر حسینه آغلار

یئرده‌ن آخان اوْلۇرلار، گویا کی گؤز یاشێدێ

هفت زمین ناله، ائیله‌ر حسینه آغلار

گۆلزار-ی-مصطفی‌نی، بۇ آیدا سوْلدۇرۇبلار

پژمُرده حاله قالدێ، گۆل‌لر حسینه آغلار

شمس‌الضّحا بۇ آیدا، غرق‌الدُجا اوْلۇبدۇ

اوْلمۇش خسوف؛ ماه-ی-انور حسینه آغلار

یۆز مین نفر جمع اوْلدۇ، تا اؤلدۆره حسینی

راوی دئییر تامامی، لئشگه‌ر حسینه آغلار

گلدی اوْ شئمر-ی-کافر، اؤلدۆرمه‌گه حسینی

گؤردۆ اوْغۇل آناسێ، اطهر حسینه آغلار

گؤرجک اوْ حالی زینب، یۆز قوْیدۇ قتلگاهه

اخا-اخا دلینده، ازبر حسینه آغلار

گئچ پرده‌لی آماندێ، «سیّد» قلم دایاندێ

عرش-ی-خدا تزلزل، ائیله‌ى حسینه آغلار

قوْشار: سیّد

حسینین عزاسی تازه‌له‌ندی

گینه بۇ آی حسینین عزاسی تازه‌له‌ندی

قۇرۇلدۇ بزم-ی-ماتم اۆره‌گله‌ر یاره‌له‌ندی

گلدی مه-ی-مصیبت، عالم هامێ قان آغلار

اهل-ی-عزا تماماً آهیله سینه داغلار

گیریان اوْلۇب فلک‌لر، گؤیده ملک‌لر آغلار

قۇرۇلدۇ بزم-ی-ماتم اۆره‌گله‌ر یاره‌له‌ندی

حیله ائدیب حسینی آلدێ اوْ قۇم آرایه

گۆل جیسمینه دگیبدی دؤرت مین دئییرله یاره

چوْخ غم یئتیب اوْ گۆنده، زهرای-ی-مصطفیٰ‌یه

قۇرۇلدۇ بزم-ی-ماتم اۆره‌گله‌ر یاره‌له‌ندی

زهراء گئییبدی قاره، ماتم دۇتۇب حسینه

حسین- حسین دییه‌ر چوْخ، آغلار اوْ نور-ی-عئینه

سنده گل آغلا شیعه، اوْل شاه-ی-مشرقینه

قۇرۇلدۇ بزم-ی-ماتم اۆره‌گله‌ر یاره‌له‌ندی

اولاد-ی-هاشیمیه بۇ آی شهید اوْلۇبدۇ

سقّای-ی-کربلانین مشگینه قان دوْلۇبدۇ

آهو صفت حَرملر، بۇ آی گۆل تک سوْلۇبدۇ

قۇرۇلدۇ بزم-ی-ماتم اۆره‌گله‌ر یاره‌له‌ندی

روز-ی-جزا اوْلۇنجا، آرتار بۇ آیدا غملر

علّت بۇدۇر بۇ آیدا، تئشنه اؤلۆب اوْ سرور

بیرده خیامه گلدی نعش-ی-«علی اکبر»

قۇرۇلدۇ بزم-ی-ماتم اۆره‌گله‌ر یاره‌له‌ندی

یاز بۇ کلامی «سیّد» سن نوحه-وْ-نوا ائت

آل مطلب‌ون حسینده‌ن بۇ دردیوه دوا ائت

تأخیری ائتمه ایندی، بزم-ی-عزایه دۇر گئت

قۇرۇلدۇ بزم-ی-ماتم اۆره‌گله‌ر یاره‌له‌ندی

قوْشار: سیّد